ನಿನ್ನ 3 ಜನ ಅಣ್ಣಂದಿರಿಂದ ಅದೆಷ್ಟು ಕಿಸ್ಸುಗಳು ಮಿಸ್ಸಾದವು?

ಹದಿನೇಳನೆಯ ಕ್ರಾಸಿನ ಹುಡುಗಿಗೆ !

ತುಂಬಾ ದಿನಗಳಾದ ಮೇಲೆ ಪತ್ರ ಬರ್ದಿದ್ದಾನೆ ಕರಿಯಾ ಅಂತ ಒಂದು ಮುಕ್ಕಾಲು ಕೇಜಿ ಕೋಪ ಬಂದಿರಬೇಕು ಅಲ್ಲವಾ? ಇಲ್ಲಿ ನಾನು ನಿನ್ನ ಒಂದುವರೆ ಇಂಚು ಮೂಗು ನೀನು ಕೋಪಿಸಿಕೊಂಡಾಗ ಹೇಗೆ ಕಾಂಡೀತು ಎಂದು ನೆನೆಯುತ್ತ ಮತ್ತೆ ನಿನ್ನ ನೆನೆಯುತ್ತಾ ಮತ್ತೆ ನಿನ್ನೊಬ್ಬಳನ್ನೆ ನೆನೆಯುತ್ತಾ ಈ ಪತ್ರವನ್ನ ಬರೆಯುತ್ತಿದ್ದೇನೆ. ಎಂದಿನಂತೆ ನಾನು ನಿನ್ನ ನೆನಪಲ್ಲಿ ಫ಼ುಲ್ ದಿಲ್ಕುಷ್. ನೀನು ಕೊಟ್ಟ ಅಷ್ಟೂ ಮುತ್ತುಗಳನ್ನ ಈ ಎದೆಯೊಳಗೆ ಜೋಪಾನವಾಗಿ ಜೋಡಿಸಿಟ್ಟು ದಿನಕ್ಕೊಂದರಂತೆ ತೆಗೆದುಕೊಂಡು ಮತ್ತಷ್ಟು ಮುತ್ತುಗಳಿಗೆ ಬೇಡಿಕೆ ಸಲ್ಲಿಸುವವನಿದ್ದೀನಿ. ಮುತ್ತು ಮತ್ತು ನನ್ನ ಬಗೆಗಿರುವ ಪ್ರೀತಿಯ ವಿಷಯದಲ್ಲಿ ನೀನು ಅಕ್ಷಯ ಪಾತ್ರೆ ಮತ್ತು ನಾನು ಅಕ್ಷಯಪಾತ್ರೆಯನ್ನೂ ಖಾಲಿಮಾಡಿ ಬಿಡುತ್ತೇನೆಂದು ಹೊರಟ ಒರಟ.

ಮತ್ತೆ ಹೇಗಿದ್ದಾರೆ ನಿನ್ನ ದೂರ್ವಾಸಮುನಿಯಂತ ಮೂರು ಜನ ಅಣ್ಣಂದಿರು? ಸುಂದರವಾದ ಹುಡುಗಿಯ ಹಿಂದೆ ಈ ದೇವರು ಅನ್ನುವ ಪಾಪಿಷ್ಟ, ಬಲಿಷ್ಟ ಅಣ್ಣಂದಿರನ್ನ ಹುಟ್ಟಿಸಿರುತ್ತಾನೆ ಅನ್ನುವ ಮಾತು ಕೇಳಿದ್ದೆ, ಆದರೆ ಇದು ನಿನ್ನ ವಿಷಯದಲ್ಲಿ ನಿಜವಾಯ್ತು ಅಲ್ವಾ? ದೂರ್ವಾಸಮುನಿಯಂತ ನಿನ್ನಣ್ಣಂದಿರಿಂದ ಅದೆಷ್ಟು ಕಿಸ್ಸುಗಳು ಮಿಸ್ಸಾದವು ನೆನಪಿದೆಯಾ? ಅದೆಷ್ಟು ಅಪ್ಪುಗೆಗಳು ತಬ್ಬಲಿಗಳಾದವು ನೆನಪಿದೆಯಾ? ಅದೆಷ್ಟು ಮಾರ್ನಿಂಗ್ ಶೋ ಸಿನಿಮಾಗಳು ಲಾಸು ಮಾಡಿಕೊಂಡವು ನೆನಪಿದೆಯಾ? ತುಂಬಾ ಹೂವುಗಳು ನಿನ್ನ ಮುಡಿಗೇರಲಿಲ್ಲ.. ತುಂಬಾ ತುಂಬಾ ಬೇಜಾರಾದಾಗಾ ನನ್ನ ಕಣ್ಣ ಹನಿಗಳು ನಿನ್ನ ಮಡಿಲು ಸೇರಲಿಲ್ಲ. ಪಾರ್ಕಿನ ಮೂಲೆಯ ಬೆಂಚುಗಳು ಮತ್ತು ನಿನ್ನ ಮನೆಯ ಹದಿನೇಳನೆಯ ಕ್ರಾಸಿನ ಮೂಲೆಯ ಕತ್ತಲು ನಾಚಿಕೊಳ್ಳಲಿಲ್ಲ.. ನಿನ್ನ ಬಂಗಾರದಂತ ಕಾಲ ಬೆರಳುಗಳಿಗೆ ನನ್ನ ಒರಟು ಒರಟು ಕಾಲ ಬೆರಳು ತಾಗಿಸಿಕೊಂಡು ನಡೆಯುವಾಗ ನನಗಾಗುತ್ತಿದ್ದ ಕುಷಿ ಮತ್ತೆ ನನಗೆ ಸಿಗಲಿಲ್ಲ..ನಿನ್ನ ಕೈ ಹಿಡಿದು ನಡೆಯುತ್ತಿದ್ದರೆ ಊರಲ್ಲಿರೊ ಅಷ್ಟೂ ಹುಡುಗರ ಹೊಟ್ಟೆ ಉರಿಯುವುದನ್ನ ಮತ್ತೆ ನೋಡಲಾಗಲೇ ಇಲ್ಲವಲ್ಲಾ? ಇಷ್ಟೆಲ್ಲ ಲಾಸುಗಳನ್ನ ಅದ್ಯಾವ ದೇವರು ತಂದುಕೊಡುತ್ತಾನೆ? ತುಂಬಿಕೊಡುತ್ತಾನೆ?

ನಿಂಗೆ ಈ ಪತ್ರ ಓದಿ ನಗು ಬರ್ತಿದ್ಯಾ? ಪತ್ರ ತಮಾಷೆ ತರ ಕಾಣ್ಸುತ್ತಾ ? ಸರಿ ಹಗಾದ್ರೆ ಕೇಳಿಲ್ಲಿ.. ನಂಗೆ ನಿನ್ನ ಬಿಟ್ಟು ಬದುಕಿರೋ ಶಕ್ತಿ ಇದ್ಯಾ ಅಂತ ತುಂಬಾ ಸಲ ಕನ್ನಡಿ ಮುಂದೆ ನಿಂತು ಕೇಳಿಕೊಂಡಿದ್ದೀನಿ. ನನ್ನ ಕಣ್ಣುಗಳೇ ಧಾರಾಕಾರವಾಗಿ ಅಳುವ ಮೂಲಕ ನನ್ನ ಪ್ರಶ್ನೆಗೆ ಉತ್ತರಿಸಿವೆ. ನನ್ನಿಂದ ನಿನ್ನನ್ನ ದೂರ ಮಾಡಿದ ನಂತರದ ಒಂದು ಕ್ಷಣದಿಂದಲೇ ನಿನ್ನ ಮೇಲಿನ ನನ್ನ ಪ್ರೀತಿ ಇಮ್ಮಡಿಯಾಗಿದೆ..ಅದಕ್ಕಾಗಿ ನಿನ್ನ ಮನೆಯವರಿಗೆ ಗೌರವಪೂರ್ವಕವಾಗಿ ಒಂದು ದೊಡ್ಡ ಥ್ಯಾಂಕ್ಸ್. ಮತ್ತಷ್ಟು ದೂರ ಮಾಡದೇ ಇದ್ದರೆ ಆ ಇಲ್ಲದ ದೇವರಿಗೂ ಒಂದು ದೊಡ್ಡ ಥ್ಯಾಂಕ್ಸ್ ಮತ್ತು ಇಲ್ಲಿಂದಾನೆ ಒಂದು ಫ಼್ಲಯಿಂಗ್ ಕಿಸ್ಸು. ಮತ್ತೆ ನೀನು ನಂಬುವ ನಾನು ನಂಬದೇ ಇರುವ ದೇವರಲ್ಲಿ ನಾನು ಕೇಳಿಕೊಳ್ಳುವುದಿಷ್ಟೆ. ಈ ಪೆದ್ದು ಹುಡುಗಿಗೆ ಒಂದಿಷ್ಟು ಗ್ರಾಮುಗಳ ತೂಕದ ದೈರ್ಯವನ್ನಾದರೂ ಕೊಡು ಅಂತ. ಆ ಮೂಲಕವಾದರೂ ತನ್ನ ಅಣ್ಣಂದಿರ ಮುಂದೆ ನಿಂತು, ನಂಗೆ ಆ ಕರಿಯನನ್ನ ಕೊಡ್ಸಿ ಅನ್ನುವ ಮಾತು ಆಡ್ತಿಯೇನೊ ಅಂತ. ಇಲ್ಲವಾದರೇ ಹೇಗಿದ್ದೀಯೋ ಹಾಗೆ ಮನೆಯ ಬಾಗಿಲಿಗೆ ಬಂದುಬಿಡು. ಮನೆಯ ಮತ್ತು ಈ ಎದೆಯ ಹೊಸ್ತಿಲು ಯಾವತ್ತು ನಿನಗೆ ಅಂತಾನೆ ಕಾಯುತ್ತಿರುತ್ತೆ.

ನಿನಗೆ ಗೊತ್ತ? ಪ್ರತಿದಿನ ನಾನು ದೀಪ ಹಚ್ಚುವಾಗ ಆರಿಸುವಾಗ ಮತ್ತು ಮಲಗುವಾಗ ನಿನ್ನ ನೆನಪು ಮಾಡಿಕೊಳ್ಳುತ್ತೇನೆ.. ನನಗೆ ನೀನೆಂದರೆ ಬೆಳಕು, ನೀನೆಂದರೆ ಕತ್ತಲು ನೀನೆಂದರೆ ಹಾಸಿಗೆ ಮತ್ತೆ ಕೊನೆಯದಾಗಿ ನೀನೆಂದರೆ ನನ್ನ ಎಲ್ಲ ನೆನಪುಗಳ ಮೆರವಣಿಗೆ ಮತ್ತೆ ನೀನೆಂದರೆ ನನ್ನ ಮುಂದಿರುವ ಪೂರ್ತಿ ಬದುಕು !

ನಿನ್ನವನೆ

ನವಿಲೂರ್ ಹುಡ್ಗ

 

ಕಣ್ಣು ಕ್ಯಾಂಪಸ್ಸಿನಲ್ಲಿ ಕುಳಿತ ಚಂದನೆಯ ಕಣ್ಣುಗಳ ಭೇಟೆಯಾಡುತ್ತೆ !

ಯಾರಲ್ಲಿ?..!
ಈಗಷ್ಟೇ ಹದಿನಾರು ತುಂಬಿ ಹದಿನೇಳು ಅಷ್ಟೇ.. ಅಷ್ಟೇನಾ? ನಿಜ ಹೇಳ್ಬೇಕು ಅಂದ್ರೆ ಹುಡುಗೀರು ನಮ್ ನಮ್ ವಯಸ್ಸನ್ನ ಕುಚ್ ಕುಚ್ ಕಮ್ಮಿ ನೇ ಹೇಳ್ಕೊಳ್ಳೋದು. ನಿಜ ಹೇಳಬೇಕು ಅಂದ್ರೆ ನನಗೆ ಹದಿನೇಳಾಗಿ ಒಂದು ವರ್ಷ ಆಯ್ತಪ್ಪ ! ಇಲ್ಲಿವಯವರೆಗು ನಾನಾಯ್ತು, ನನ್ನ ಪುಸ್ತಕಗಳಾಯ್ತು, ನನ್ನ ಪುಟಾಣಿ ಸ್ಕೂಟಿ, ನಮ್ಮಪ್ಪಾಮ್ಮ ನನ್ ಕೆಲ್ವು ಜಿಗ್ರಿ ದೋಸ್ತುಗಳಾಯ್ತು ಅಂತ ಇದ್ಬಿಟ್ಟೆ. ಮತ್ಯಾಕೆ ಈ ಪತ್ರ ಬರೆಯುವ ಉಮೇದು ಬಂದಿದ್ದು ಅಂತ ಕೇಳಬೇಡಿ..ನಾಚಿ ನೀರಾಗಿ ಹೋಗ್ಬಿಡ್ತೀನಿ ಅಷ್ಟೆ. ಹೊರಗೆಲ್ಲೋ ಅಪಾಚ್ಚಿ ಬೈಕಿನ ಸದ್ದು ಕೇಳಿದರೆ ನನಗ್ಯಾಕೊ ಇಲ್ಲಿ ಸುಮ್ನಿರೋಕಾಗ್ತಿಲ್ಲ! ಅದ್ಯಾರೋ ಪೋಲಿ ಹುಡುಗನ ಬೆನ್ನಿಗೆ ತನ್ನನ್ನಂಟಿಸಿಕೊಂಡು ಕುಳಿತಿರುವ ಆ ಹುಡುಗಿ ನನ್ನ ಸವತಿಯೇನೋ ಅನ್ನಿಸಿಬಿಡತ್ತೆ. ಪುಸ್ತಕವನ್ನ ಎದೆಗೊತ್ತಿಕೊಂಡು ಸುಮ್ಮನೆ ತಲೆಬಗ್ಗಿಸಿ ಕಾಲೇಜಿನ ಕ್ಯಾಂಪಸ್ಸಿನಲ್ಲಿ ಮೊದ್ಲಿನ್ ತರ ಓಡಡೋಕ್ ಆಗ್ತಿಲ್ಲ. ಕಣ್ಣು ಕ್ಯಾಂಪಸ್ಸಿನಲ್ಲಿ ಕುಳಿತ ಚಂದನೆಯ ಕಣ್ಣುಗಳ ಭೇಟೆಯಾಡುತ್ತೆ. ಮನೇನಲ್ಲಿ ಸುಮ್ಮನೆ ಸೀರೆ ಸುತ್ತಿಕೊಂಡು ಕನ್ನಡಿ ಮುಂದೆ ನಿಂತ್ಕೊಂಡು ಬಿಟ್ರೆ ನಿಮಿಷ ಘಂಟೆಗಳೆಲ್ಲ ಆತ್ಮಹತ್ಯೆ ಮಾಡ್ಕೋತಾವೆ. ಅಮ್ಮ ಅನುಮಾನದ ಕಣ್ಣುಗಳಲ್ಲಿ ನೋಡ್ತಾಳೆ. ನಾನು ಸುಮ್ಮನೆ ತುಂಟನಗು ನಕ್ಕು ಬಾಗಿಲು ಹಾಕೊಂಡ್ಬಿಡ್ತೀನಿ. ದಿಂಬು ಉಸಿರುಗಟ್ಟಿ ಸಾಯುತ್ತೆ. ಮತ್ತೇ ಮತ್ತೇ ಮುಂದೇ ಎನ್ ಗೊತ್ತ?..ಬೇಡ ಸೆನ್ಸಾರ್ ಕಟ್ ಪ್ಲೀಸ್..!
ಪ್ಲೀಸ್ ಬೈಯ್ಕೋಬೇಡಿ ನಾನು ತುಂಬಾ ತುಂಬಾ ಒಳ್ಳೆ ಹುಡುಗಿ ಗೊತ್ತ !

ನಿಜ ಕಣ್ರಿ ಐ ಯಾಮ್ ಇನ್ ಲವ್ ! ಹಾಗಂತ ಇನ್ನೂ ಯಾರನ್ನೂ ಇಷ್ಟಪಟ್ಟಿಲ್ಲ! ನನಗೂ ಒಬ್ಬ ಗೆಳೆಯ ಅಂತ ಇದ್ದಿದ್ರೆ ಅನ್ನಿಸೋಕೆ ಶುರುವಾಗಿದೆ ! ಕ್ಯಾಂಪಸ್ಸಿನ ಮಸಾಲ ದೊಸೆಯನ್ನ ಇಬ್ಬರೂ ಹರಿದು ಮುರಿದು ತಿನ್ನಬೇಕು ಅನ್ನಿಸ್ತಿದೆ, ಯಾವುದಾದರೂ ಎರೆಡು ಕಣ್ಣುಗಳೂ ಸುಮ್ಮನೆ ನನ್ನೇ ನೋಡ್ಬೇಕು ಅನ್ನಿಸ್ತಿದೆ, ಅವನ ತಬ್ಬಿಕೊಂಡು ಹಿ ಈಸ್ ಮೈ ಡ್ರೀಮ್ ಬಾಯ್ ಅಂತ ನನ್ನ flirt ಗೆಳತಿಯರ ಮುಂದೆ ನಿಲ್ಬೇಕು ಅನ್ನಿಸ್ತಿದೆ. ಈ ಹೆಗಲ ಮೇಲೆ ಒಂದಿಷ್ಟು ಕೇಜಿ ತೂಕದ ಕೈ ಯಾವಗಲೂ ಇರಬೇಕು ಅನ್ನಿಸ್ತಿದೆ. ಹಾದಿ ಬೀದೀಲಿ ನನ್ನ ರೇಗಿಸಿದೋರ ಮೂತಿ ಕೆಂಪಾಗಿಸೋ ಕಪ್ಪು ಬಣ್ಣದ ರಾಜಕುಮಾರ ಬೇಕು. ಮೊದಲೇ ಹೇಳಿಬಿಡ್ತೀನಿ ನನಗೆ ಕಪ್ಪು ಬಣ್ಣದ ರಾಜಕುಮಾರನೇ ಬೇಕು. ಯಾಕೋ ಕಪ್ಪು ಬಣ್ಣ ಅಂದ್ರೆ ನನಗಿಷ್ಟಾನಪ್ಪ. ಆದ್ರೆ ತುಂಬ ಚಂದ ಇರ್ಬೇಕು ಓಕೆ ನ? ಯಾಕೆ ಅಂತ ಸ್ವಲ್ಪ ಕೇಳಿ.. ನಾನು ಇಡೀ ಕಾಲೇಜಿನ ಹಾಟ್ ಕೇಕ್ ತರ ಇದ್ದೀನಿ. ಇಂತ ಕ್ಯೂಟ್ ಹುಡುಗಿಗೆ ಎಂತ ಹುಡುಗ ಇರ್ಬೇಕು ಅಲ್ವಾ?

ಇದನ್ನೇ ಅಡ್ವಾಂಟೇಜ್ ಆಗಿ ತಗೊಳ್ಳೋದಾದ್ರೆ ನನಗವನು ಖಂಡಿತ ಬೇಡ ! ಅವನ ಜೊತೆ ನಾನ್ ಪಾರ್ಕಿಗೆ ಬರೋಲ್ಲ! ಅಪ್ಪು ಸಿನಿಮಾಗೆ ಆದ್ರೆ ಖಂಡಿತ ಮಾರ್ನಿಂಗ್ ಷೋಗೆ ಬಂದೇ ಬರ್ತೀನಿ! ಸಿನಿಮಾದ ಕತ್ತಲಲ್ಲಿ ಏನಾದ್ರೂ ಆಟ ಆಡಿದ್ರೆ ಹುಷಾರ್! ನನಗಿಷ್ಟ ಆಯ್ತು ಅಂದ್ರೆ ಸುಮ್ಮನೆ ಯಾರಿಗೂ ಗೊತ್ತಾಗದ ಹಾಗೆ ಒಂದು ಚೋಟ ಮುತ್ತು ಕೊಟ್ಬಿಡ್ತೀನಿ ಹಾಗಂತ ಮತ್ತೆ ಅವನು ಮುಂದುವರಿಯೋ ಹಾಗಿಲ್ಲ ! ತುಂಬಾ ಪುಟ್ಟ ಹುಡುಗಿ ನನಗೆ ಏನೂ ಗೊತ್ತಾಗೊಲ್ಲ ಅಂದುಕೊಂಡು ಸುಮ್ಮನೆ ಬೈಕಿಗೆ ಬ್ರೇಕು ಹಾಕಿದ್ರೆ ಸರಿ ಇರಲ್ಲ ಮತ್ತೆ!
ನನಗಿಷ್ಟ ಆದ್ರೆ ನಿನ್ನ ಉಸಿರುಕಟ್ಟೋ ಹಾಗೆ ತಬ್ಬಿಕೊಳ್ಳೋಕು ಬರುತ್ತೆ ಚಿಂತೆ ಬೇಡ ! ತುಂಬಾ ಮುದ್ದಾಗಿ ಬೆಳೆದ ಹುಡುಗಿ ನಾನು ಅದಕ್ಕಿಂತ ಮುದ್ದಾಗಿ ನೋಡ್ಕೋಬೇಕು ! ಅಪ್ಪ ಅಮ್ಮಾ ಅಂದ್ರೆ ಪ್ರಾಣ ನನಗೆ
ಅವರ ಕೈಕಾಲು ಹಿಡಿದಾದ್ರು ಒಪ್ಪಿಸ್ಬೇಕು ! ಮನೆ ಬಿಟ್ಟು ಬರೋ ಜಾಯಮಾನ ನನ್ನದಂತೂ ಅಲ್ಲ ಇದೊಂದು ವಿಷ್ಯದಲ್ಲಿ ನೋ ಕಾಂಪ್ರೋಮೈಸ್ ಡಿಯರ್ !

ಲವ್ ಲೆಟರ್ ಎಲ್ಲ ಬರಿಯೋ ಹುಡುಗಿ ಹೇಗೋ ಏನೋ ಅಂತ ಯೋಚನೆ ಬೇಡ. ನನಗೆ ಗೊತ್ತು ನಾನ್ ಸೂಪರ್ ಹುಡುಗಿ ಅಂತ. ನನಗೊಬ್ಬ ಸೂಪರ್ ಗೆಳೆಯ ಬೇಕು ಅಷ್ಟೇ ! ಪ್ಲೀಸ್ ಕೆಳಗಿನ ನಂಬರ್ ಗೆ ಒಂದು ಕಾಲ್ ಮಾಡಿ ಕಾಯ್ತ ಇರ್ತೀನಿ. ಸುಮ್ಮನೆ ಒಂದು ಸಲ ನನ್ನ ಧ್ವನಿ ಕೇಳೋಕಾದ್ರೂ ಮಾಡ್ತೀರಿ ಅಲ್ವಾ?

ಈ ನಂಬರಿನ ಹುಡುಗಿ !
9986843622

 

ಹಾಯ್ಕುಗಳು !

ಅವನ ಮೇಲಿನ
ಒಂದು ದಿನದ ಹಂಬಲದ
ಮುಂದೆ ಶಬರಿಯ ವರ್ಷದ
ದಾಖಲೆಗಳೆಲ್ಲ ಚಿಂದಿಯಾದವು !
———————
ನಿನ್ನೆ ಮದ್ಯದ ಹನಿಯ
ಜೊತೆ ಸಿಗರೇಟಿನ
ಘಾಟು ಜೊತೆಯಾಗಿದ್ದಾಗ
ನೀನು ನೆನಪಾಗಲಿಲ್ಲ..
ಹಾಗಾದರೆ ಯಾರು ಪವಿತ್ರ !
———————

ನೋವನ್ನು
ಆಚರಿಸುತ್ತಿದ್ದೇನೆ !
ನಿನ್ನ ಸಹಾಯಕ್ಕೆ
ಧಿಕ್ಕಾರ ಹಾಗೂ
ಧನ್ಯವಾದಗಳು
———————
ಈಗೀಗ ಮಗ್ಗಲು
ಬದಲಿಸಲೂ ಭಯ !

ಪಕ್ಕದಲ್ಲಿ ನೀನಿಲ್ಲದಿದ್ದರೆ ?
———————

ನಿನ್ನ ಹೆಸರು
ಬರೆದ ಪೆನ್ನಿನ ತುದಿಯನ್ನ
ಅಕ್ಕಸಾಲಿಗ
ಕೊಂಡೊಯ್ದಿದ್ದಾನೆ !
———————

ಎಂತಹ ಅದೃಷ್ಟಶಾಲಿ !
ಕೊನೆಯ ಪಕ್ಷ
ನಿನ್ನ ನೆನಪಾದರೂ
ಜೊತೆಗಿದೆ
———————

( ಹಾಯ್-ಬೆಂಗಳೂರು ಪತ್ರಿಕೆಯಲ್ಲಿ ಪ್ರಕಟಿತ)

 

ಒಂದೆರೆಡು ಹನಿ !

ಸತ್ತ ಬೇರು
ಚಿಗುರಿಬಿಟ್ಟಿದೆ !
ನೀನೆ ಬೇಡಿಕೊಂಡಿರಬೇಕು!
ಇಲ್ಲಾ ಮರದ ಮರೆಗೆ ನಿಂತು
ಹಾಡಿರಬೇಕು !

ನೀನು ನಿನ್ನೆ
ಹಾಡಿದ ಹಾಡಿಗೆ
ತೂಕ ಬಂದುಬಿಟ್ಟಿದೆ !

ನನ್ನ ಜೊತೆ
ಅವನಿಲ್ಲವಾದ ದಿನ
ಜಗತ್ತಿನ ಸಮಸ್ತ
ದೇವರುಗಳಿಗೆ ಒಂದಿಷ್ಟು
ಶಾಪಗಳು ಹೆಗಲೇರಲಿವೆ !

ಇಲ್ಲಿ ಒಂದು ಪಂದ್ಯ,
ತಾಕತ್ತಿದ್ದರೆ ಸಮಸ್ತ
ಸಾಗರಗಳು ಈ ಎದೆಯ
ಒಲವನ್ನ ತುಂಬಿಸಿಕೊಳ್ಳಲಿ

ಒಂದು ದಿನ
ನಿನ್ನೊಂದಿಗೆ
ಮಾತನಾಡಲಿಲ್ಲ!
ಜೀವನಪೂರ್ತಿ
ನಿನ್ನ ಜೊತೆಗಿರುವ
ಶಿಕ್ಷೆ ವಿಧಿಸಿಬಿಡು !

(ವಿಜಯ ಕರ್ನಾಟಕ ಪತ್ರಿಕೆಯಲ್ಲಿ ಪ್ರಕಟಿತ)

 

ಇಂತಿ ನಿನ್ನ ಪ್ರೀತಿಯ…ನಾನ್ಯಾರು?

ಕೋತಿಮರೀ!

ಮೊದಲೆಲ್ಲ ನಿನ್ನ ಹೀಗೆ ಕರಿಯೋಕೆ ಎಷ್ಟು ಚೆನ್ನಾಗಿರ್ತಿತ್ತು ಗೊತ್ತ? ಹೀಗೆ ಕರಿಯೋದೆ ಒಂದು ಹಬ್ಬ. ನಿನ್ನ ತುಂಟತನ, ನಿನ್ನ ಕಪಿಚೇಸ್ಟೆ, ನಿನ್ನ ಹುಡುಗುತನ, ಮತ್ತು ಕೋತಿ……..ಅಂತ ಹೇಳಿ ನೀನು ಹಲ್ಕಿರಿಯುತ್ತಿದ್ದ ನಿನ್ನ ಆ ನಿಶ್ಕಲ್ಮಶ ನಗು ಇದ್ಯಾವುದನ್ನೂ ನನ್ನಿಂದ ಮರಿಯೋಕಾಗುತ್ತಿಲ್ಲ. ನೀನು ಮಾತಿನ ಮಲ್ಲಿ, ಒಂದು ಸಲವು ನಾನು ನಿನ್ನ ಮುಂದೆ ಗೆದ್ದಿದ್ದಿಲ್ಲ ಬರೀ ಸೋತಿದ್ದೆ ಸೋತಿದ್ದು. ಆದರೂ ಪ್ರತಿ ಸಲ ಸೋತಾಗಲು ನಾನೆ ಗೆದ್ದೆ ಅನ್ನುವಷ್ಟು ಖುಷಿ, ಆದರೂ ನೀನು ನನ್ನವಳಲ್ಲ ಅನ್ನುವ ಒಂದೇ ಒಂದು ದೊಡ್ಡ ಸೋಲಿದೆಯಲ್ಲ? ಈ ಸೋಲು ಯಾವತ್ತು ನನ್ನ ಈ ಮುಖದಲ್ಲಿ ನಗುವನ್ನ ಕಾಣದಿರುವ ಹಾಗೆ ಮಾಡಿಬಿಡುತ್ತದೇನೊ..!!

ನನಗೆ ಯಾವುದನ್ನು ಮರಿಯೋದಕ್ಕೆ ಆಗುತ್ತಿಲ್ಲ. ಸುಮ್ಮನೆ ಮರೆತವನಂತೆ ನಾಟಕವಾಡುತ್ತೀನಿ ಅಷ್ಟೆ. ಸಮಸ್ತ ಮೊಬೈಲು ಕಂಪನಿಗಳು ನಮ್ಮಿಬ್ಬರಿಂದಾನೆ ಉದ್ಧಾರವಾದವೇನೊ. ಪ್ರತಿ ಸಲ ಮೊಬೈಲು ಕಳೆದುಕೊಂಡಾಗಲೂ ಕಾಯಿನ್ ಬೂಥುಗಳ ಗುಡಾಣದಂತಹ ಹೊಟ್ಟೆಗೆ ಬರ್ಜರಿ ಮೃಷ್ಟಾನ್ನ ಭೋಜನ ಮಾಡಿಸುತ್ತಿದ್ದೆವು ನೆನಪಿದೆಯಾ? ಮತ್ತೆ ನನ್ನ ಕಡುಗಪ್ಪು ಕೈ ಹಿಡಿದು ನೀನು ರೋಡು ದಾಟಿಸುತ್ತಿದ್ದ ಪರಿಯ ನೆನೆಸಿಕೊಂಡರೇ ಸಾಕು.. ದೇವರೇ.. ಈ ಕೈ ಯಾವತ್ತು ಸಡಿಲಾಗದಂತೆ ಶಾಪ ಕೊಟ್ಟುಬಿಡು ಅಂತ ಅದೆಷ್ಟು ಸಲ ಗೋಗರೆದಿದ್ದೆನೊ..! ನೆನಪಿದೆಯಾ? ಮೊದಲ ಸಲ ನಿನ್ನ ಮುಂದೆ ನಿಂತಾಗ ಬೆವರುತ್ತಿದ್ದ ಪರಿ? “ಯಾಕೊ ಹೀಗೆ ನಡುಗುತ್ತಿದ್ದೀಯ?” ಅಂತ ನೀನು ಕಿಚಾಯಿಸಿದರೆ. “ಬಿಸಿಲಲ್ಲಿ ಬಂದೆ ಅಲ್ಲವಾ ಅದಕ್ಕೆ” ಅಂದ ನಾನು ನಿನ್ನ ಮುಂದೆ ಮಂಗನಾಗಿದ್ದು? ಯಾಕಂದರೆ ಅದು ಜೂನ್ ತಿಂಗಳ ಮದ್ಯಕಾಲ. ಸೂರ್ಯನ ದರ್ಶನವಾಗಿ ಅದೆಷ್ಟು ದಿನಗಳಾಗಿದ್ದವೊ.. ಇನ್ನು ಬೆವರುವ ಮಾತೆಲ್ಲಿ?

ನೀನಾದರೂ ಅಷ್ಟೆ ಯಾವತ್ತು ನಾನು ನಿನಗಿಷ್ಟ ಅನ್ನುವ ಹಾಗೆ ನಡೆದುಕೊಳ್ಳಲಿಲ್ಲ. ಅಸಲಿಗೆ ನೀನು ಯಾವ ಹುಡುಗರನ್ನು ಕಣ್ಣೆತ್ತಿ ಕೂಡ ನೋಡುತ್ತಿರಲಿಲ್ಲ ಬಿಡು. ಆದರೆ ಒಂದು ಹುಡುಗಿ ಹೇಗಿರಬೇಕೊ ಹಾಗಿದ್ದೆ. ಈಗಲು ಹಾಗೆ ಇದ್ದೀಯ ಅದೇ ನಿನ್ನ ಇಷ್ಟಗಲ ಮಗುವಿನಂತಹ ನಗುವಿನೊಂದಿಗೆ. ಅದೇನ ನನಗಿಷ್ಟವಾಗಿದ್ದು? ಎಲ್ಲಾ ಹುಡುಗರ ಹಾಗೆ ನಾನು ಕೇವಲ ನಿನ್ನ ಮಾತಿಗೆ ನಿನ್ನ ನಗುವಿಗೆ ಕರಗಿಬಿಟ್ಟೆನ? ಇಲ್ಲ, ಸಾದ್ಯವೇ ಇಲ್ಲ. ನನಗೆ ಇಷ್ಟವಾಗಿದ್ದು ನೀನು ಅಷ್ಟೆ. ನಿನ್ನೊಳಗಿನ ಆ ನಗು ಮಾತ್ರವಲ್ಲ ಕಣೆ, ಅಮ್ಮನಂತ ಪ್ರೀತಿಯಿದೆ, ಅಕ್ಕನಂತಹ ಅಕ್ಕರೆಯಿದೆ. ಆದರೆ ನೋಡು ನನಗೆ ಇದ್ಯಾವುದನ್ನು ಅನುಭವಿಸುವ ಭಾಗ್ಯವೇ ಇಲ್ಲ. ನಾನು ಅನಾಥ ಅನ್ನುವ ಭಾವ ಕಾಡದಿರುತ್ತದ ಹೇಳು. ನೀನು ಬಿಡು ಎಲ್ಲ ಕುಲ್ಲಂ ಕುಲ್ಲ. ನಾನಿನ್ನು ನಿನಗೇನು ಹೇಳಿರಲೇ ಇಲ್ಲ. ಅಷ್ಟರಲ್ಲಿಯೇ ನೀನು, ಮಾತಿನ ಮದ್ಯೆ “ಈ ಪ್ರೀತಿ ಪ್ರೇಮ ಎಲ್ಲ ನನಗಿಷ್ಟ ಇಲ್ಲಪ್ಪ, ಅಪ್ಪಿತಪ್ಪಿ ಕೂಡ ನನ್ನ ಮೇಲೆ ಯಾವುದೇ ತರಹದ ಭಾವನೆಯಿಟ್ಟುಕೊಳ್ಳಬೇಡ ನಾವಿಬ್ಬರು ಗೆಳೆಯ ಗೆಳತಿಯರಾಗಿದ್ದರೇನೆ ಮಜಾ ಅಲ್ಲವ” ಅಂತ ಇಷ್ಟಗಲ ನಕ್ಕು ಬಿಟ್ಟು ಫೋನಿಟ್ಟೆ ನೆನಪಿದೆಯಾ? ಹೌದು ಹೌದು ಹೌದು ಅಂತ ನಾನು ನಕ್ಕು ಸುಮ್ಮನಾಗಿ ನೀನು ಪೋನಿಟ್ಟ ಮೇಲೆ ಬಿಕ್ಕುತ್ತಿದ್ದೆ.

ಇದೆಲ್ಲವನ್ನ ನಿನಗೆ ಫೋನಿನಲ್ಲೇ ಹೇಳಬಹುದಿತ್ತು. ನಿನ್ನ ಧ್ವನಿ ಕೇಳಿದ ಕೂಡಲೆ ಹೇಳಬೇಕಾಗಿರೊದನ್ನೆಲ್ಲ ಮರೆತು, ಮಂಗನ ಹಾಗೆ ಬಲವಂತದಿಂದ ಯಾವುದೋ ಜೋಕು ಹೇಳಿಕೊಂಡುಬಲವಂತದ ನಗುವನ್ನ ಮುಖದ ಮೇಲೆ ತಂದುಕೊಳ್ಳೊದಕ್ಕೆ ಒದ್ದಾಡುತ್ತೀನಿ. ಅದಕ್ಕೆ ಈ ಪತ್ರ. ಪತ್ರಬರೆದಾದ ಮೇಲಾದ್ರು ನಿನಗೆ ತಲುಪಿಸ್ತೀನಿ ಅನ್ನೊ ಬರವಸೆ ನನಗೂ ಇಲ್ಲ. ಒಂದು ಮಾತು,.. ನಿನ್ನ ನಿರಾಕಾರಣೆ ನನ್ನ ಜೀವನದಲ್ಲಿ ಒಂದು ಕಪ್ಪು ಚುಕ್ಕಿಯಷ್ಟೆ. ಆ ಕಪ್ಪು ಚುಕ್ಕಿ ಮರೆಯಾಗೊದು ಸ್ವಲ್ಪ ತಡವಾಗಬಹುದು. ಇದೇ ಕಾರಣಕ್ಕೆ ನಿನ್ನ ಮೇಲೆ ದ್ವೇಷ ಸಾದಿಸೊಲ್ಲ. ಕನಸಿನಲ್ಲಿಯೂ ಕೂಡ ನಿನ್ನ ಬಗ್ಗೆ ಕೆಡುಕು ಬಯಸೊಲ್ಲ. ಬಾರು ಪಬ್ಬುಗಳ ಗೆಳೆತನ ನನ್ನಿಂದಾಗಲ್ಲ. ಯಾಕಂದ್ರೆ ನಾನು ನಿನ್ನ ಗೆಳೆಯ. ನೀನು ಇಷ್ಟು ಒಳ್ಳೆಯವಳಾಗಿರುವಾಗ ನಾನು ಹೇಗೆ ಅಷ್ಟು ಕೆಟ್ಟವನಾಗಿರೋಕೆ ಸಾದ್ಯ? ಇನ್ನು ತುಂಬಾ ತುಂಬಾ ಹೇಳೋದಿತ್ತು. ಇಷ್ಟು ಹೇಳೋಷ್ಟರಲ್ಲಿಯೇ ಯಾಕೊ ಕಣ್ಣುಗಳೆಲ್ಲ ನೀರು ನೀರಾಗಿ ಪತ್ರವೆಲ್ಲ ಒದ್ದೆಯಾಗುತ್ತಿದೆ. ಉಳಿದಿದ್ದು ನನ್ನೊಳಗೆ ಉಳಿದು ಬಿಡಲಿ ಬಿಡು. ನಾನು ಅಳಿಯುವ ತನಕ

ಇಂತಿ ನಿನ್ನ ಪ್ರೀತಿಯ
ನಾನ್ಯಾರು ?

 

ಎರೆಡು ಸಾಲಿನ ಕಥೆಗಳು ಭಾಗ 3

ಕೂಡಲೇ ಅವಳಲ್ಲಿ ಒಂದು ಸುಳ್ಳು ಹೇಳಬೇಕಿತ್ತು ಇವನು. ಅವಳ ಕಣ್ಣುಗಳ ನೋಡಿ ತಡವರಿಸುತ್ತಲೇ ಸತ್ಯ ಹೇಳಿ ಒಂದು ಮುತ್ತು ಪಡೆದುಕೊಂಡ…!

——————————————————————-
ಮದುವೆಯಾಯಿತು.ಅವನು ಬದುಕಲು ಬೇಕಾಗುವ ಸಾಮಾನುಗಳ ಪಟ್ಟಿ ತಯಾರಿಸುತ್ತಿದ್ದ.
ಮತ್ತೆ ಇವಳ ಮುಖವನ್ನೊಮ್ಮೆ ನೋಡಿದ .ಸಾಮಾನುಗಳ ಪಟ್ಟಿ ಯಾಕೋ ಪೂರ್ತಿಯಾಗಲಿಲ್ಲ.
——————————————————————-

ಅದೆಷ್ಟೋ ಹಾಡುಗಳನ್ನ ಬರೆದಿದ್ದ. ಈಗ ಒಂದು ಬರೆಯಲಾಗುತ್ತಿಲ್ಲ ಅನ್ನುತ್ತಿದ್ದಾನೆ. ಮತ್ತೆ ಅವಳು ನೆನಪಾಗುತ್ತಿದ್ದಾಳೆ..ನೆನಪಾಗುತ್ತಿಲ್ಲ ಅನ್ನುತ್ತಿದ್ದಾನೆ…!
——————————————————————-

ಬಂಜೆ ಅಂದು ಮೂದಲಿಸಿದರು ಮಂದಿ. “ ನಿನಗೆ ನಾನು ಮಗು ನನಗೆ ನೀನು ಮಗು” ಅನ್ನುವ ತನ್ನವನ ಮಾತು ನೆನಪಾಗಿ ದುಃಖ ಕಮ್ಮಿ ಮಾಡಿಕೊಂಡಳು…!
——————————————————————-

ತಾನೆಷ್ಟು ಪ್ರೀತಿಸುತ್ತೇನೆ ಅಂತ ತನ್ನ ಗೆಳತಿಗೆ ಹೇಳುತ್ತಿದ್ದ. “ಎಷ್ಟು ಪ್ರೀತಿಸ್ತೀಯ” ಅಂದು ಕಣ್ಣು ಮಿಟುಕಿಸಿದಳು. ಇವನಿಗೆ ಆಕಾಶದಲ್ಲಿನ ನಕ್ಷತ್ರಗಳ ಲೆಖ್ಖ ಸಿಗಲಿಲ್ಲ.
——————————————————————-

ಪ್ರೀತಿಸಿದ್ದನ್ನ ಕುಷಿಯಿಂದ ಪುಟಗಟ್ಟಲೇ ಬರೆದುಕೊಂಡಳು.. ದ್ವೇಶಿಸಿದ್ದನ್ನ ಬಿಕ್ಕಳಿಸುತ್ತ ಒಂದು ಸಾಲು ಬರೆಯಲಾಗದೆ ಖಾಲಿಯಾದಳು.!
——————————————————————-

ಚಂದನೆಯ ಹೆಸರಿನ ಗೆಳೆಯ ಸತ್ತು ಹೋಗಿದ್ದ. ಹಾಳುಜನ ಕೂಡಲೇ ಅವನಿಗೊಂದು ಹೆಸರಿಟ್ಟಿದ್ದರು. “ಬಾಡಿ” ಇನ್ನು ಬಂದಿಲ್ಲವಂತೆ ಅನ್ನುತ್ತಿದ್ದರು.
——————————————————————-

“ ನನಗಿಷ್ಟ ಇಲ್ಲ ನೀನು” ಅಂದವನನ್ನೊಮ್ಮೆ ನೋಡಿದಳು. “ಮೊದಲು ನಾನಾಡಿದ ಮಾತುಗಳನ್ನ ಕಾಪಿ ಮಾಡ್ತೀಯೇನೊ” ಅಂದು ನಕ್ಕಳು. ಅವನು ನಗಲಿಲ್ಲ. ಮತ್ತೆ ಅವಳು ಯಾವತ್ತೂ ನಗಲಿಲ್ಲ.
——————————————————————-

ಗೆಳೆಯ ಗೆಳತಿಗೆ ದೇವರು ಪ್ರತ್ಯಕ್ಷವಾಗಿ ಏನು ವರ ಬೇಕು ಅಂತ ಕೇಳಿದ. “ಒಂದಿಷ್ಟು ಚಳಿಗಾಲ ಪ್ಲೀಸ್”ಅಂದು ಇಬ್ಬರೂ ನಕ್ಕರು.
——————————————————————-

ಒಂದು ದಿನ ತುಂಬಾ ಸುಂದರವಾದ ಹೂವುಗಳ ಓಟದ ಸ್ಪರ್ಧೆ ನಡೆಯಿತು. ನನ್ನವಳಿಗೆ ಮೊದಲ ಬಹುಮಾನ ಸಿಕ್ಕಿತು.
——————————————————————-

(ವಿಜಯ ಕರ್ನಾಟಕ ಪತ್ರಿಕೆಯಲ್ಲಿ ಪ್ರಕಟಿತ)

 

ಯಾರಾದ್ರೂ ನಿನ್ ಕಡೆ ನೋಡ್ಲಿ, ಹಂಗೆ ಕಣ್ಣು ಕಿತ್ತಾಕಿಬಿಡ್ತೀನಿ !

ಹೇಗಿದ್ದಿಯೋ ಒರಟ ? ಬಿಡೋ ನನಗೆ ಗೊತ್ತಿದೆ. ಯಾವುದೋ ಲೇಡೀಸ್ ಕಾಲೇಜ್ ಮುಂದೆ ನಿನ್ನ ಯಮಹ ಆರ್ ಎಕ್ಸ್ ಬೈಕಿನಲ್ಲಿ ರೌಂಡಿಂಗ್ ಮಾಡ್ತಿರ್ತಿಯ, ನೀನು ನಿನ್ನ ಆ ಡಬ್ಬಾ ಗಾಡಿ ನ ಓಡ್ಸೋ ಸ್ಪೇಡಿಗೇನೆ ಎಷ್ಟೋ ಹುಡುಗೀರ ಎದೆಯಲ್ಲಿ ಅವಲಕ್ಕಿ ಕುಟ್ಟುತಿರ್ತೀಯ, ಯಾವ ಹುಡುಗಿ ನೋಡೋಕೆ ವೈನಾಗಿದ್ದಾಳೆ ಅಂತ ಕಣ್ಣಲ್ಲೆ ಬೇಟೆಯಾಡುತಿರ್ತೀಯ, ನೋಡೋ ನಿನ್ನ ಎಲ್ಲಾ ದಶಾವತಾರಗಳನ್ನು ನಾನು ಬಲ್ಲೆ. ಆದರೆ ನಿನ್ನ ಆ ಅಮಾಯಕ? ಕಣ್ಣುಗಳಲ್ಲಿದೆಯಲ್ಲಾ ಆ ಅಮಾಯಕತೆ..! ನಿನ್ನೆಲ್ಲಾ ತರಲೆಗಳನ್ನ ಕ್ಷಮಿಸುವಂತೆ ಮಾಡುತ್ತೆ ಕಣೋ. ಎಷ್ಟು ಚೆಂದವಿದ್ದಾವೋ ನಿನ್ನ ಈ ಜಿಂಕೆ ಕಣ್ಣುಗಳು? ಒಂದೇ ಒಂದು ಸಲ ಮುತ್ತಿಡಲ? ಪ್ಲೀಸ್ ಕಣೋ. ಯಾಕೋ ಇಷ್ಟು ಹತ್ತಿರವಾಗಿ ಬಿಟ್ಟೆ ಬಿಟ್ಟಿರಲಾರದಷ್ಟು ?ಮುದ್ದು ಒರಟ, ಐ ಲವ್ ಯೂ ಗೊತ್ತ.

ಒಂದು ದಿನಾ ಆದ್ರು ತಲೆ ಬಾಚಿದ್ದಿಯೇನೊ ತರಲೆ? ಎಷ್ಟು ದಿನ ಆಯ್ತೊ ನಿನ್ನ ಕುರುಚಲು ಗಡ್ಡಗಳಿಗೆ ಬ್ಲೇಡು ತಾಗಿಸಿ? ಬೆಂಗಳೂರಿನ ಅಷ್ಟೂ ರಸ್ತೆಗಳನ್ನ ನಿನ್ನ ಹರಕಲು ಮುರುಕಲು ಜೀನ್ಸ್‌ಲ್ಲೆ ಗುಡಿಸಿ ಸ್ವಚ್ಚ ಮಾಡುತ್ತೀಯಲ್ಲೊ? ನೋಡೋ ನಿನಗೇ ಅಂತಾನೆ ಮಿಂಚಿಂಗ್ ಮಿಂಚಿಗ್ ಡ್ರೆಸ್ಸೆಲ್ಲ ಹಾಕೊಂಡು ಕ್ಲಾಸಿನ ಮೊದಲ ಬೆಂಚಲ್ಲೆ ನಿನ್ನ ಕಣ್ಣುಗಳ ಬೇಟೆಯಾಡಲು ಕುಳಿತರೆ, ನಿನೇನೋ ಆ ಕುಂದಾಪುರದ ಕೋಮಲಾಂಗಿ ಪಕ್ಕದಲ್ಲೆ ಕುಳಿತುಕೊಂಡು ಹಲ್ಲುಗಿಂಜುವುದು? ಅದು ಅಲ್ಲದೇ ನಿಂದೇನು ಆ ಹಿಸ್ಟರಿ ಟೀಚರಮ್ಮ ಬಾಯಿಬಡಕಿ ಆಂಟಿಯ ಜೊತೆ ಕಣ್ಣು ಸನ್ನೆ ಬಾಯಿ ಸನ್ನೆ? ನನಗೆ ತುಂಬಾ ಕೋಪ ಬರತ್ತೆ ಕಣೋ, ಆ ಕೋಪದಲ್ಲಿ ಹಂಗೆ ನಿನ್ನ ತಬ್ಬಿಕೊಂಡು ನಿನ್ನ ಉಸಿರುಗಟ್ಟಿಸಿ ಹಾಗೆ ನಿನ್ನ ಕಣ್ಣುಗಳಿಗೆ ಲೊಚ್ಚ್ ಅಂತ ಒಂದು ಮುತ್ತು ಕೊಟ್ಟು ಬಿಡ್ತೀನಿ ನೋಡು.

ಎಷ್ಟು ಹುಡುಗೀರನ್ನ ನೋಡಿದ್ದೀಯ ನೀನು? ಅದಕ್ಕಿಂತ ಜಾಸ್ತಿನೇ ಜೊಲ್ಲು ಜೊಲ್ಲು ಹುಡುಗರನ್ನ ನಾನು ನೋಡಿದ್ದೀನಿ ಕಣೊ. ಆದರೆ ಯಾವತ್ತು ನಿನ್ನ ಹಾಗೆ ಅಮ್ಮಾ ತಾಯಿ ಅಂತ ಹೋಗಿಲ್ಲ ತಿಳ್ಕೋ. ಜೀವನ ಅಂದ್ರೆ ಒಂದು ಹುಡುಗಿಯ ತೋಳ ತೆಕ್ಕೆಯಲ್ಲಿ ಕರಗಿ ನೀರಾಗುವುದು ಅಂದುಕೊಂಡಿದ್ದೀಯೇನೊ ಬೆಪ್ಪ? ಎಷ್ಟು ದಿನ ನೀನು ಆ ಜೋಷ್ ನಲ್ಲಿರ್ತೀಯ ? ಎಷ್ಟು ದಿನ ನೀನು ಆ ಖುಷಿನಲ್ಲಿರ್ತೀಯ? ಇವೆಲ್ಲ ನೀರ ಮೇಲಿನ ಗುಳ್ಳೆಗಳು ಕಣೊ. ಬಾ ಜೀವನ ಅಂದ್ರೆ ನಾನು ನಿನಗೆ ಹೇಳಿ ಕೊಡ್ತೀನಿ, ನೀನು ನನಗೆ ಹೇಳಿ ಕೊಡು. ಜೀವನ ಪೂರ್ತಿ ನಾವಿಬ್ರೂ ಜೊತೆಯಾಗಿರಬಹುದು ಕಣೊ.ನಿನ್ನೆಲ್ಲ ತರಲೆ ತಾಪತ್ರಯಗಳ ಹೊರತಾಗಿಯೂ.

ನಿಜ ಹೇಳೋ ನನಗೇನಾಗಿದೆ? ಹಿಸ್ಟರಿ ಟೀಚರಮ್ಮ ತರ ಗುಂಡುಗುಂಡಾಗಿದ್ದೀನ? ಅಥವ ನಿನ್ನ ಕುಂದಾಪುರದ ಕೋಮಲಾಂಗಿ ತರ ಸಣಕಲು ಬಡಕಲು ಮೇಕೆ ತರ ಇದ್ದೀನ? ಒಂದು ಸಲ ನೋಡೊ ನನ್ನ , ಸುಮ್ಮನೆ ನನ್ನ ಮುಟ್ಟಬೇಕೆಂದರೂ ನೀನು ಕೈತೊಳೆದು ಮುಟ್ಟಬೇಕು ಕಣೊ ಹಾಗಿದ್ದೀನಿ. ಜೊತೆಗೆ ನಿನಗೇ ಅಂತಾನೆ ಜೋಪಾನವಾಗಿಟ್ಟುಕೊಂಡಿರುವ ಬಂಗಾರದಂತಹ ಹೃದಯ..! ಆದರೆ ನೀನು? ಮುಟ್ಟಿ ಕೈತೊಳೆದುಕೊಳ್ಳಬೇಕು ಹಾಗಿದ್ದೀಯ ಒರಟ, ನೋಡು ಪ್ರೀತಿಗೆ ಬಣ್ಣದ ಹಂಗಿಲ್ಲ ಕಣೊ, ನಿನ್ನ ಒರಟುತನ, ನಿನ್ನ ಸೋಮಾರಿತನ, ನಿನ್ನ ಅಲೆಮಾರಿತನ, ನಿನ್ನ ಲೋಲುಪತನ ನಿನ್ನ ಹೆಣ್ಣುಬಾಕತನ, ಇದ್ಯಾವುದು ನಿನ್ನ ಮೇಲಿರುವ ನನ್ನ ಆರಾಧನಾಭಾವವನ್ನ ಕಡಿಮೆಮಾಡದು ಕಣೊ . ನನಗೆ ಬೇಕೆಂದರೆ ಸಾಲು ಸಾಲು ಜೊಲ್ಲು ಮುಖದ ಹುಡುಗರನ್ನ ಸಾಲು ಸಾಲಾಗಿ ನಿಲ್ಲಿಸ್ತೀನಿ ಕಾಲೇಜಿನ ಕಾಂಪೌಂಡಿನ ಮುಂದೆ. ಆದರೆ ಅವರ ಕಣ್ಣುಗಳಲ್ಲಿ ನನ್ನ ಚಿತ್ರ ಕಾಣೊಲ್ಲಗೊತ್ತ. ಅದು ನಿನ್ನ ಕಣ್ಣುಗಳಲ್ಲಿ ಮಾತ್ರ ಕಣೋ. ಈ ಸಲದ ನಿನ್ನ ಯಮಹ ಬೈಕಿನ ಸಂಜೆಯ ಹುಡುಗಿಯರ ಕಾಲೇಜಿನ ರೌಂಡಿಂಗ್ಸ್ ಗೆ ನಾನು ಜೊತೆಯಾಗಿರ್ತೀನಿ. ನೋಡೋಣ ಅದ್ಯಾರು ನಿನ್ನ ಈ ಕೋತಿ ಮೂತಿಗೆ ಮರುಳಾಗ್ತಾರೆ ಅಂತ..ಯಾರಾದ್ರು ನಿನ್ ಕಡೆ ನೋಡ್ಲಿ, ಹಂಗೆ ಕಣ್ಣು ಕಿತ್ತಾಕಿಬಿಡ್ತೀನಿ. ನೀನು ಇಷ್ಟೊಂದು ಒರಟ ಆದ್ರೆ ನಾನಾಗಬಾರದೇನೊ? ಆದ್ರೆ ನೋಡೊ ಮನಸ್ಸು ಮಾತ್ರ ನವಿಲುಗರಿಯ ಹಾಗೇನೆ ಗೊತ್ತ. ಒಂದು ಸಲ ಸುಮ್ಮನೆ ಈ ಎದೆಯೊಳಗೆ ಬಾ…ನಿನ್ನ ಜೋಪಾನವಾಗಿ ಬಚ್ಚಿಟ್ಟುಕೊಳ್ಳುತ್ತೀನಿ.ನೀನು ಅಲ್ಲಿರುವ ನಿನ್ನದೇ ಹಾಡುಗಳನ್ನ ನನ್ನ ರಾಗದಲ್ಲೇ ಹಾಡುವಂತೆ. ಜಗತ್ತಿಗೆಲ್ಲ ಪ್ರೇಮಗೀತೆ ಅಮಲು ಹತ್ತಿಕೊಳ್ಳುವಂತೆ ಮಾಡೋಣ. ಏನಂತೀಯೊ ಓರಟ?

 

ಎದೆಯ ಅಣೆಕಟ್ಟು ಕಟ್ಟೆಯೊಡೆಯುತ್ತಿದೆ

ನಾನು ನಿನ್ನ ರಸ್ತೆಯಲ್ಲಿ
ಕೊನೆಯವರೆಗೂ ಸಾಗಬೇಕಿತ್ತು,
ಮದ್ಯೆ ಮದ್ಯೆ ದಾರಿ ಹರಿದಿತ್ತು
ಮತ್ತೆ ಬೆಳಕು ಮುನಿದಿತ್ತು.
ಪೂರ್ತಿಯಾಗುವ ಮೊದಲೆ
ಪ್ರಯಾಣ ಮುಗಿದಿತ್ತು.

ನಿನಗೇ ಅಂತ ನಾನು
ಬರೆದಿಟ್ಟ ಹಾಡುಗಳ
ಎಲ್ಲಾ ಸಾಲುಗಳು
ಅಳಿಸಿಹೋಗಿದ್ದವು
ಮತ್ತೆ ಬೆರೆಯೋಣವೆಂದರೇ
ನೀನು ನೆನಪಾಗುತ್ತಿದ್ದಿಯಾ
ಮತ್ತೆ ನೆನಪಾಗುತ್ತಿಲ್ಲ!

ಹಾಗೆ ಒಂದು ಸಲ ಅತ್ತು
ಬಿಡೋಣವೆಂದು ಕೊಂಡರೇ
ನಿನಗೆ ಕೊಟ್ಟ ಮಾತು, ಮತ್ತೆ
ಅತ್ತಾಗ ನೀನಿಟ್ಟ ಮುತ್ತು ನೆನಪಾಯಿತು.!
ದುಃಖ ನುಂಗಿಕೊಂಡೆ..ಅದರೂ
ಮಾತು ಉಳಿಸಿಕೊಳ್ಳಲಾಗುತ್ತಿಲ್ಲ
ಎದೆಯ ಅಣೆಕಟ್ಟು ಕಟ್ಟೆಯೊಡೆಯುತ್ತಿದೆ !

ಎಲ್ಲಾ ನೆನಪುಗಳಿಗೂ
ಒಂದು ಸಮಾಧಿ ಕಟ್ಟಿಸಬೇಕು!
ಎಲ್ಲಾ ಹನಿಗಳಿಗೂ ಒಂದು
ದೊಡ್ಡ ನದಿಯ ಹುಡುಕಬೇಕು !
ಮತ್ತೆ ನಾನು ದೂರ ದೂರ ಹೋಗಬೇಕು
ಕ್ಷಮಿಸು ಅಲ್ಲಿ ನೀನು ನೆನಪಾಗೊಲ್ಲ
ಮತ್ತೆ ನೆನಪಾಗಬಾರದು ಕೂಡ!

 

ಒಂದೆರೆಡು ಸಾಲಿನ ಕತೆಗಳು.(ಭಾಗ ೨)

——————————————————–
ಶೆಟ್ಟರ ಅಂಗಡಿಯಲ್ಲಿ ಶಾಪಿಂಗ್ ಮಾಡುತ್ತಿದ್ದ ಗಂಡನಿಗೆ, ತನ್ನ ಹೆಂಡತಿಯ ಗಲ್ಲದ ನೆನಪಾಗಿ, ನಾಚಿ ನೀರಾಗಿ, ಬೆಲ್ಲ ತರುವುದು ಮರೆತುಬಿಟ್ಟ.
——————————————————–
ಅಮ್ಮನಿಗೀಗಾಗಲೇ ಅರ್ಜೆಂಟ್ ಕಾಶಿಗೆ ಹೋಗಬೇಕಾಗಿದೆ. ದೇವರ ಮನೆಯಲ್ಲಿರುವ ಹಳೆಯ ಡಬ್ಬಿಗೆ ಅಗಾಗ ಒಂದೆರೆಡು ರೂಪಾಯಿಗಳನ್ನ ತುಂಬುತ್ತಿದ್ದಾಳೆ ಅದರೂ ತುಂಬುತ್ತಿಲ್ಲ..ಮಗ ಎಮ್ ಎನ್ ಸಿ ಕಂಪನಿಯ ನೌಕರನಂತೆ.
——————————————————–
ನಾಲ್ಕು ಹೆಜ್ಜೆಗಳು ಒಟ್ಟಿಗೆ ಹೋಗಬೇಕು ಅಂತ ಎರೆಡು ಹೆಜ್ಜೆಗಳು ಬಯಸಿದ್ದವು. ಎರೆಡು ಹೆಜ್ಜೆಗಳು
ಒಪ್ಪಲಿಲ್ಲ.ಕೊನೆಗೆ ನಾಲ್ಕೂ ಹೆಜ್ಜೆಗಳು ಅನಾಥವಾದವಂತೆ.
——————————————————–
ಗೆಳೆಯ ಗೆಳತಿ ಬೆಟ್ಟು ಕಟ್ಟಿದರು.ಚಳಿಗಾಲ ಬೆಚ್ಚಗಿರುತ್ತೆ ಅಂದ ಗೆಳೆಯ ಬೆಟ್ಟು ಗೆದ್ದುಬಿಟ್ಟ.
——————————————————–
ಒಂದು ಕತೆಯ ಪಾತ್ರಕ್ಕೆ ನ್ಯಾಯ ಸಿಕ್ಕಿಲ್ಲವಂತೆ. ನ್ಯಾಯಕ್ಕಾಗಿ ಕಾದಂಬರಿಕಾರನ ಹತ್ತಿರ ಧರಣಿ ಕೂತಿದೆ. ಕಾದಂಬರಿಕಾರ ತನ್ನ ತಾನು ಸಂತೈಸಿಕೊಳ್ಳುತ್ತಿದ್ದಾನೆ.
———————————————————
ಪ್ರೇಮಿಗಳು ಮದುವೆಯಾದರು.ಮದುವೆಯಾಗಲು ಕಾರಣರಾದ ಎಲ್ಲರನ್ನು ನೆನೆಸಿಕೊಂಡು
ಕೃತಜ್ನತೆ ಅರ್ಪಿಸಿದರು. ಆದರೆ ಯಾಕೋ ನಾಲ್ಕೂ ಕಣ್ಣುಗಳು ಧಾರಾಕಾರವಾಗಿ ಅಳುತಿದ್ದವು.
———————————————————
ಅವಳ ಗೆಜ್ಜೆ ಸದ್ಧು ಮದುವೆಯ ಮೊದಲು ಹೇಗೆ ಕೇಳಿಸುತ್ತಿತೋ ಈಗ ಹಾಗೆಲ್ಲ ಕೇಳಿಸುತ್ತಿಲ್ಲವಂತೆ.
ಗೆಜ್ಜೆ ತೆಗೆದಿಟ್ಟು ಮನೆಯಲ್ಲಿ ಒಡಾಡಬಾರದ ಅಂದು ಸಿಡುಕುತ್ತಿದ್ದಾನೆ.
———————————————————
ಒಂದೂರಲ್ಲಿ ಒಂದು ಹುಡುಗನಿದ್ದ. ಮದುವೆಯಾದ. ಒಂದು ತಿಂಗಳು ಹನಿಮೂನು ಮುಗಿಸಿಕೊಂಡುಬಂದ.
ಅದೇ ಊರಿನಲ್ಲಿ ಒಂದು ಮುದ್ದಾದ ಹುಡುಗಿ.ಆ ಹುಡುಗಿಯ ಆತ್ಮಕ್ಕೂ ಒಂದು ತಿಂಗಳಾಗಿತ್ತು.
———————————————————-
ಇದು ನಿನಗೆ ನಾನು ಬರೆಯುತ್ತಿರುವ ಕೊನೆಯ ಪತ್ರ ಅನ್ನುವ ಪತ್ರ ಅವಳಿಗೆ ಸಿಕ್ಕಿದ್ದು ಒಂದರ ಹಿಂದೊಂದು ಜೋಡಿಸಿಟ್ಟ ಅವನ ೫೦೦ ಪ್ರೇಮ ಪತ್ರಗಳ ಅಡಿಯಲ್ಲಂತೆ.
———————————————————–
ಅವನು ಡಿವೋರ್ಸ್ ತಗೊತೀನಿ ಅಂತ ತಮಾಷೆಗೆ ಅಂದ. ಇವಳು ದೇವರ ಮುಂದೆ ಹಣತೆ ಹಚ್ಚಿಟ್ಟು
ನಿಜಕ್ಕೂ ಅತ್ತಿದ್ದಳೂ ಅನ್ನುವುದಕ್ಕೆ ಸಾಕ್ಷಿಯಾಗಿ ಹಣತೆಯಾರಿತ್ತು.ಅಲ್ಲಿ ಅವಳ ಕಣ್ಣೀರಿತ್ತು

(ವಿಜಯ-ಕರ್ನಾಟಕ ಪತ್ರಿಕೆಯಲ್ಲಿ ಪ್ರಕಟಿತ)

 

ತುಂಬಾ ತುಂಬಾ ಲವ್ ಯೂ…

ಒಲವಿನ ಭಾನು.

ಹೀಗೆ ನಿನ್ನ ಹೆಸರು ಬರೆಯಲು ಹೊರಟ ಈ ಪೆನ್ನಿನ ಮೂತಿಯ ತುದಿ ಬಂಗಾರವಾಯಿತು..ಹಾಗೆಯೇ ನಿನ್ನ ಹೆಸರು ಬರೆಸಿಕೊಂಡ ಈ ಹಾಳೆಯ ಮೇಲೆ ಬಂಗಾರದ ಚಿತ್ತಚಿತ್ತಾರಗಳು.ನಿನ್ನ ನೆನಪು ಮಾಡಿಕೊಂಡ ನನ್ನ ಮನಸ್ಸಿಗೆ ಈಗಾಗಲೇ ಬಂಗಾರದ ಕಾಲುಗಳು.ನಿನ್ನ ತುಂಬಿಕೊಂಡ ಈ ಕಂಗಳಲ್ಲಿ ಬಂಗಾರದ ಕನಸುಗಳು.ನಿನ್ನ ಜೊತೆ ಇಡಬೇಕಾದ ಹೆಜ್ಜೆಗಳ ಹಿಂದುಮುಂದೆಲ್ಲ ಬಂಗಾರದ ಹೂವುಗಳು.ನನ್ನೊಳಗೆ ನೀನಿಟ್ಟ ಎಲ್ಲ ರಂಗೋಲಿಗಳು ಕೂಡ ಬಂಗಾರದ ಚುಕ್ಕಿಗಳು ಅಲ್ಲವ? ನಿನ್ನ ತಬ್ಬಿಕೊಂಡ ಈ ಎದೆಯ ಅಷ್ಟೂ ರೋಮಗಳಲ್ಲಿ ಬಂಗಾರದ ತೆನೆಗಳು.ನಿನ್ನ ಜೊತೆ ನಾನಿರುವ ಒಂದು ಚಿಕ್ಕ ಗುಡಿಸಲು ಕೂಡ ಬಂಗಾರದ ಅರಮನೆ. ಕೈಬಳೆ ಬಂಗಾರವಲ್ಲ, ನಿನ್ನ ಕೈ ಬಂಗಾರ. ಕಾಲ್ಗೆಜ್ಜೆ ಬಂಗಾರವಲ್ಲ, ನೀನಿಟ್ಟ ಪ್ರತಿಹೆಜ್ಜೆಂii ಸಪ್ಪಳ ಕೂಡ ಬಂಗಾರವೇ. ನಿನ್ನ ಜೊತೆಗಿದ್ದ ಈ ಆರುನೂರ ಇಪ್ಪತ್ತು ದಿನಗಳು ಬಂಗಾರದಂತ ದಿನಗಳೇ ಆಗಿದ್ದವು. ಇನ್ನು ಜೊತೆಗಿರುವ ಸಾವಿರಾರು ದಿನಗಳೂ ಬಂಗರದಂತ ದಿನಗಳೇ ಆಗಿರುತ್ತವೆ.

ಭಾನು… ನಿನಗೆ ಒಂದು ಪತ್ರಬರಿಲಿಕ್ಕೆ ಕುಳಿತವನಿಗೆ ನೋಡು ಏನೂ ತೋಚುತ್ತಿಲ್ಲ. ನೀನು ನನ್ನೆಡೆಗಿಟ್ಟಿರುವ ಪ್ರೀತಿಗೆ ಈ ಪತ್ರ ತುಂಬ ಚಿಕ್ಕದು ಕಣೆ. ಮೊದಮೊದಲು ತುಂಬಾ ಗೋಳು ಹೊಯ್ದುಕೊಂಡೆ ಕ್ಷಮೆಯಿರಲಿ. ನಾನಿರುವ ಕಲರ್ ಗೆ ಅಷ್ಟೊಂದು ಸ್ಕೋಪ್ ತಗೋಬಾರದಿತ್ತು ಅದಕ್ಕೊಂದು ಕ್ಷಮೆಬೇಕು. ನಿಂಜೊತೆ ಸಿನಿಮಾಗೆ ಬರಲಿಲ್ಲ ಅದಕ್ಕೂ ಕ್ಷಮೆಬೇಕು. ನಿಂಜೊತೆ ಗುಟ್ಟಾಗಿ ಕುಳಿತು ಬೈಟು ಟೀ ಕುಡಿಯಲಿಲ್ಲ, ಇಲ್ಲಿಯವರೆಗೆ ಒಂದು ಪುಟಾಣಿ ಐಸ್ಕ್ರೀಮ್ ತಿನ್ಸಿಲ್ಲ, ನಿನ್ನ ಕೆಲವು ನೋವುಗಳಿಗೆ ನಗು ತುಂಬಲಿಲ್ಲ,ಅದಕ್ಕೂ ಕ್ಷಮೆಯಿರಲಿ. ಕೆಲವು ಸಲ ತುಂಬಾ ಕೆಟ್ಟದಾಗಿ ಬೈದಿದ್ದೀನಿ ಅದಕ್ಕೊಂದು ದೊಡ್ಡ ಕ್ಷಮೆ ಇರಲಿ. ಆದರೂ ಇಂದಿಗೂ ಬೆಟ್ಟದಷ್ಟು ಪ್ರೀತಿಸುತ್ತಿದ್ದೀಯ ಅಲ್ಲವ, ಅದಕ್ಕೆ ನಿನ್ನ ಬಂಗರದಂತವಳು ಅಂತ ಕರೆದಿದ್ದು. ನಿಜಕ್ಕೂ ನಿನಗೆ ನಾನು ಅರ್ಹನ ಅಂತ ಯೋಚಿಸ್ತಿರೋವಾಗಲೇ, ಚಿನ್ನ.. ಮಿಸ್ ಯೂ ಅನ್ನುವ ನಿನ್ನ ಬಂಗಾರದಂತಹ ಎಸ್ಸೆಮ್ಮೆಸ್ಸ್ ಬಂದುಬಿಡುತ್ತೆ. ಎಲ್ಲವನ್ನು ಮರೆತು ನಾನು ಮಿಸ್ ಯು ಟೂ ಅಂದುಬಿಡುತ್ತೇನೆ.

ಭಾನು… ನಿಜಕ್ಕೂ ಹುಡುಗಿಯರಿಗೆ ಒಂದಿಷ್ಟು ಆಸೆಗಳು ಅಂತ ಇರ್ತಾವಂತೆ ನಿಜಾನ? ಹುಡುಗ ಸುಂದರವಾಗಿರ್ಬೇಕು, ಬಹಳ ಎತ್ತರವಾಗಿರಬೇಕು, ಕಣ್ಣು ತುಂಬಾ ಚಂದವಿರಬೇಕು, ಪಸ್ಟ್ ಕ್ಲಾಸ್ ಅನ್ನುವ ಕೆಲ್ಸ, ಕೈ ತುಂಬ ಸಂಬಳ..ಹೀಗೆ ಇಷ್ಟೆ ಚಿಕ್ ಚಿಕ್ಕ ಆಸೆಗಳು ಕಣೆ..ಇದೆಲ್ಲ ನಿಜ ಅಲ್ವ? ಆದರೇ ನಾನಿದರಲ್ಲಿ ಏನು ಅಲ್ಲವಲ್ಲೆ? ಸದ್ಯಕ್ಕೆ ನಾನು ಖಾಲಿ ಜೇಬಿನ ಪಕೀರ..ಈಗ ಹೇಳಿಕೊಳ್ಳುವಂತ ಕೆಲ್ಸವಾಗಲಿ,ಸಂಬಳವಾಗಲಿ,ಯಾವುದೂ ಇಲ್ಲ ಗೊತ್ತ? ಗೊತ್ತಿಲ್ಲದೇ ಏನು..! ನನ್ನನ್ನಿಷ್ಟಪಡುವ ವೂದಲ ದಿನದಂದೇ ನಿನ್ಗೆಲ್ಲ ತಿಳಿದಿತ್ತು..ಆದರೂ ಹಚ್ಚಿಕೊಂಡೆ ಮೆಚ್ಚಿಕೊಂಡೆ..ಯಾಕೆ? ಪ್ರಶ್ನೆ ಕೇಳಿದ್ದೀನಿ ಉತ್ತರ ಹೇಳಬೇಕಾದವಳು ನೀನು..ನನಗೆ ಗೊತ್ತು ನೀನು ಹೇಳೋಲ್ಲ..ಮಿಸ್ ಯೂ ಅಂತ ಮೆಸ್ಸೇಜ್ ಕಳ್ಸೋದು ಬಿಟ್ರೆ ಮತ್ತೇನು ಗೊತ್ತಿಲ್ಲ ನಿಂಗೆ.

ಮತ್ತೇನು ಇಲ್ಲಪ್ಪ..ಯಾಕೋ ಪತ್ರಬರಿಬೇಕು ಅನ್ನಿಸ್ತು ಅದ್ಕೆ ಒಂದೆರೆಡು ಸಾಲು ಬರೆದೆ. ಓದಿ ನಿನಗಿಷ್ಟ ಆಗಿ ಮಿಸ್ ಯೂ ಅಂತ ಒಂದೆಸ್ಸೆಮ್ಮೆಸ್ ಬಂದ್ರು ನನಗಷ್ಟೇ ಸಾಕು. ಮತ್ತೊಂದು ವಿಷ್ಯ.. ಬೆಳಗ್ಗಿನ ಜಾವಕ್ಕೇ ಎದ್ದು ನೀನು ಕೆಲ್ಸಕ್ಕೆ ಹೋಗೊದು ನೆನೆಸಿಕೊಂಡ್ರೆ ತುಂಬಾ ಬೇಜಾರು ಕಣೆ..ಹಂಗೆ ಬೆಳಗ್ಗೆ ೯ ಗಂಟೆಯವರೆಗೂ ನಿನ್ನ ತಬ್ಬಿಕೊಂಡು ಮುಸುಕೆಳೆದು ಮಲಗಿಬಿಡಬೇಕು ಅನ್ನಿಸುತ್ತೆ. ಮುಂದೊಂದು ದಿನ ಇದೆಲ್ಲ ಇದ್ದಿದ್ದೆ ಅಲ್ಲವ? ಸರಿ ನಿಂಗೆ ಇನ್ನೊಂದು ವಿಷ್ಯ ಹೇಳಬೇಕು ಅಂತ ಇದ್ದೀನಿ. ಅದೇನಪ್ಪ ಅಂದ್ರೆ ತುಂಬಾ ತುಂಬಾ ಲವ್ ಯೂ… ಮತ್ತೆ ತುಂಬಾ ತುಂಬಾ ಮಿಸ್ ಯೂ..

ಯಾವತ್ತೂ ನಿನ್ನ
ಕರಿಯ