ನಾನಿದ್ದೆ ನಾನಾಗಿ[ವಿನಾಯಕ ಜೋಶಿ]

ನಾನಿದ್ದೆ ನಾನಾಗಿ
ಆದರೆ ಬದಲಾದೆ ಏನಾಗಿ ?

ಜುಪ್ ಎಂದು ಎಗರುತ್ತಿದ್ದವನು
ಚಪ್ಪೇ ಕಲ್ಲಷ್ಟು ಎಗರಾದಂತಾಗಿಹೆನು
ಹೂಮೇಲಿದ್ದ ಮಿಡತೆಯನ್ನು ಹಿಡಿಯುತ್ತಿದ್ದವನು
ಹೂವಿನ ಪಾಲಾಗುವ ಮಿಡತೆಯನ್ನು ಅರಸಿದೆನು…

ನಾನಿದ್ದೆ ನಾನಾಗಿ
ಆದರೆ ಬದಲಾದೆ ಏನಾಗಿ ?

ಅಪ್ಪನ ಎತ್ತರ ಬೆಳೆದಂತೆ
ಅಪ್ಪನ ಸಮವೆಂದು ಭಾವಿಸಿದೆನು
ಅಡುಗೆ ಮನೆಯ ಡಬ್ಬದಲ್ಲಿದ್ದ ದುಡ್ಡನ್ನು
ಪೆಟ್ಟಿ ಅಂಗಡಿಯ ಪಾಲು ಮಾಡಿದೆನು

ನಾನಿದ್ದೆ ನಾನಾಗಿ
ಆದರೆ ಬದಲಾದೆ ಏನಾಗಿ ?

ನವಿಲ ಗರಿಯಂತಿದ್ದ ಗುರುವನ್ನು
ಕಾಗೆಯ ಪುಕ್ಕವೆಂದು ದೂಡಿದೆನು
ಚಿಲ್ಲರೆ ಎಂದು ತಿಳಿದ ದುಡ್ಡನ್ನು
ಚೆಲ್ಲಾ ಪಿಲ್ಲಿ ಮಾಡಿ ಅಲೆದೆನು…..

ನಾನಿದ್ದೆ ನಾನಾಗಿ
ಆದರೆ ಬದಲಾದೆ ಏನಾಗಿ ?

ಮತ್ತೇರಿದ ಆನೆಯಂತೆ
ನಡೆದಿದ್ದೆ ದಾರಿ ಎಂದೆ,
ಹಿಂತಿರುಗಿ ನೋಡಿದಾಗ
ಕೊಚ್ಚೆ ದಾರಿಯೆಂದು ಅಳಲಿದೆನು…

ನಾನಿದ್ದೆ ನಾನಾಗಿ
ಆದರೆ ಬದಲಾದೆ ಏನಾಗಿ ?

ಕೈ ಕೊಡುವ ಹುಡುಗಿ ಇದ್ದರು,
ಬಳೆ ತೊಡಿಸಿಕೊಳ್ಳುವವಳು ಬಂದರೂ,
ಅತ್ತಾಗ ಸ್ನೇಹ ತಬ್ಬಿ ಹಿಡಿದರು,
ಹೋದಾಗ ಹೆಗಲು ಕೊಡುವವರಾರಿಹರು…?

ನಾನಿದ್ದೆ ನಾನಾಗಿ
ಬದಲಾಗುವೆ ನನಗಾಗಿ……ಬದಲಾಗುವೆ ನನಗಾಗಿ

[ಇದು ಗೆಳೆಯ ವಿನಾಯಕ ಜೋಶಿ ಬರೆದಿದ್ದು]