ಗೆಳೆಯ ಒಂದು ಸಲ ಸ್ಸಾರಿ ಕೇಳ್ತೀಯಾ?

ಇನ್ಯಾವತ್ತೂ ನಿನ್ನ ನೆನಪು ಮಾಡಿಕೊಳ್ಳಬಾರದೆಂದು ಅವುಡುಗಚ್ಚಿ ಕುಳಿತಿದ್ದೆ. ಮೊಬೈಲಿನ ಸಿಮ್ಮನ್ನ ಸುಮ್ಮನೆ ಕೈಗೆ ಸಿಗದಂತೆ ಎತ್ತಿಟ್ಟಿದ್ದೆ. ನೀನು ನನಗೆ ಕದ್ದು ಮುಚ್ಚಿ ಪಪ್ಪಿ ಕೊಟ್ಟು ಕಳುಹಿಸಿದ ಪತ್ರಗಳನ್ನ ಮುಚ್ಚಿಟ್ಟಿದ್ದೆ. ನೀನು ನೆನಪಾದ ಕೂಡಲೇ ಕಣ್ಣಂಚಲ್ಲಿ ಇಣುಕುವ ಒಂದಿಷ್ಟು ಹನಿಗಳನ್ನ ನನಗೇ ಕಾಣಿಸದಂತೆ ಬಚ್ಚಿಟ್ಟಿದ್ದೆ. ಪ್ರತಿ ದಿನ ಹಾದು ಹೋಗುವ ದಾರಿಯಲ್ಲೆಲ್ಲಾದರೂ ನಿನ್ನ ಕಪ್ಪು ಮುಖ ದರ್ಶನವಾದೀತೆಂಬ ಭಯ(?)ದಿಂದ ನನಗಿಷ್ಟದ ಬಸ್ ರೂಟ್ ಬದಲಿಸಿದ್ದೆ. ಪ್ರತಿ ಕ್ಷಣ ನಿನ್ನ ನೆನಪು ಮಾಡಿಕೊಳ್ಳುವ ನನ್ನ ಅಸಹಾಯಕತೆಯನ್ನ ನಾನೆ ಮೂದಲಿಸಿದ್ದೆ. ನಿನಗಿಷ್ಟವಾದ ಚೂಡಿದಾರ್ ಯಾವತ್ತೂ ಹಾಕಲಿಲ್ಲ, ನಿನ್ನಿಷ್ಟದ ಹಾಡನ್ನ ಮತ್ಯಾವತ್ತೂ ಗುನುಗಿಕೊಳ್ಳಲಿಲ್ಲ. ನೀನು ಕುಡಿಸಿದ ಲಿಂಬು ಷರಬತ್ತು, ನೀನು ತಿನ್ನಿಸಿದ ಅರುಣ್ ಐಸ್‌ಕ್ರೀಂ, ಪ್ರೀತಿಗೆ ತಂದುಕೊಟ್ಟ ಲಿಂಬೆಹುಳಿ ಚಾಕಲೇಟ್, ಮುರಿದು ಬಿದ್ದ ಟೆಂಟಿನೊಳಗೆ ನೀನು ನನಗೆ ಕೊಟ್ಟ ಮುವತ್ಮೂರು, ಮು….. !! ಕೃಷ್ಣ ಕೃಷ್ಣ ಯಾವುದನ್ನೂ ನೆನಪು ಮಾಡಿಕೊಳ್ಳುತ್ತಿಲ್ಲ ಈ ಹುಡುಗಿ.

ಕಾರಣವೇ ಇಲ್ಲದೇ ಇಷ್ಟವಾದವನು ನೀನು.ನಿನ್ನ ಪ್ರೀತಿಸಲು ಅಸಲು ನನಗೆ ಕಾರಣವೇ ಇರಲಿಲ್ಲ. ೧೯೯೭ ಮಾಡೆಲ್ ಹೀರೋ ಹೋಂಡ ಬೈಕಿನ ಕಪ್ಪು ಸುಂದರ?ನಿಗೆ ಫೆರಾರಿ ಕಾರಿನ ಚೆಲುವೆ ಒಲಿಯುವುದೆಂದರೆ ಸುಮ್ಮನೆ ಮಾತಾ? ಕಾಚರಕನಹಳ್ಳಿಯ ಸ್ಲಮ್ಮಿನ ಗುಡಿಸಿಲಿನ ಹೊಸ್ತಿಲೊಳಗೆ ಡಾಲರ್ಸ್ ಕಾಲೋನಿಯ ಕೋಟಿ ಬಂಗಲೆಯ ಹುಡುಗಿ ಕಾಲಿಡುವುದು ಅಂದರೆ ಸುಮ್ಮನೆ ಮಾತಾ? ಕೆ.ಎಫ್.ಸಿ, ಪಿಜ್ಜ ಬರ್ಗರ್ರು, ಕಾಫಿ ಡೇ, ಗರುಡಮಾಲ್‌ಗಳ ಕಾರಿಡಾರುಗಳಲ್ಲೇ ಕಾಲು ಸವೆಸುತ್ತಿದ್ದ ಮಲ್ಲಿಗೆ ಪಾದದ ಹುಡುಗಿ ವೆಂಕಟಪ್ಪನ ಪಾನಿಪೂರಿಗೆ ಜೊಲ್ಲು ಸುರಿಸುವುದು ಅಂದರೆ ಸುಮ್ಮನೆ ಮಾತಾ? ಫೆರಾರಿ ಕಾರಿಲ್ಲದೆ ಒಂದಡಿಯೂ ಮುಂದಿಡದಿದ್ದ ಗುಲಾಬಿ ಕೆನ್ನೆಯ ಹುಡುಗಿ ಬರಿಗಾಲಲ್ಲಿ ಹುಳಿಮಾವು ಅರಕೆರೆ ಕೊಳಚೆ ಸ್ಲಮ್ಮುಗಳಲ್ಲಿ ಒಂದಿಷ್ಟು ಅಳುಕಿಲ್ಲದೆ ನಿನ್ನ ಜೊತೆಗೂಡಿ ನಡೆದಾಡಿದ್ದು ಐತಿಹಾಸಿಕ ಘಟನೆಯಾಗುವುದಿಲ್ಲವೆ ಗೆಳೆಯ?

ಕಾಂಪ್ರೋಮೈಸಿಗೆ ಪಕ್ಕ ಉದಾಹರಣೆಯೆಂದರೆ ನಾನೆ ಅಲ್ಲವೆ ಗೆಳೆಯ? ನಂಬಿಕೆ ದ್ರೋಹಕ್ಕೆ ಇನ್ನೊಂದು ಹೆಸರೇ ನೀನೆ ಕರಿಯ..! ನನಗೆ ಗೊತ್ತಿಲ್ಲದ ಹಾಗೆ ಜರಗನಹಳ್ಳಿಯ ಡುಮ್ಮಿಯ ಜೊತೆ ಇಡೀ ಬೆಂಗಳೂರು ಸುತ್ತಿದ್ದು, ದೇವಯ್ಯ ಪಾರ್ಕಿನ ಮೂರಡಿ ಕುಳ್ಳಿಯ ಜೊತೆ ಕೈ ಕೈ ಹಿಡಿದು ನಡೆದಾಡಿದ್ದು, ಮಲ್ಲೇಶ್ವರಂ ಹದಿನೆಂಟನೇ ಕ್ರಾಸಿನ ಹುಡುಗಿಯ ಉದ್ದ ಕೂದಲಿಗೆ ಫಿದಾ ಆಗಿದ್ದು, ಎಂಟನೆಯ ಮೈಲಿಯ ನಲವತ್ತರ ಆಂಟಿಯನ್ನ ನೋಡಿ ಹಲ್ಕಿರಿದ್ದಿದ್ದು ಎಲ್ಲವನ್ನು ಬಲ್ಲೆ ಕರಿಯ. ಅಂದ, ಚಂದ, ಒನಪು, ವಯ್ಯಾರಕ್ಕೆಲ್ಲ ಹೆಚ್ಚು ಆಯುಷ್ಯವಿಲ್ಲ ಅನ್ನುವುದು ನಿನಗೆ ಯಾಕಾದರೂ ಗೊತ್ತಾಗ್ತಿಲ್ವೊ ? ಮುಂದೆ ಯಾವತ್ತಾದರೂ ಈ ಡಾಲರ್ಸ್ ಬೇಬಿಯ ನೆನಪು ಮಾಡಿಕೊಳ್ಳಬಹುದೆಂಬ ಸಣ್ಣ ನಂಬಿಕೆಯಲ್ಲಿ ಸ್ವಲ್ಪವೇ ಸ್ವಲ್ಪ ನಿನ್ನ ದ್ವೇಷಿಸುತ್ತ, ಹೆಚ್ಚು ಪ್ರೀತಿಸುತ್ತ ಮುಂದೆ ಹೋಗ್ತಿದ್ದೀನಿ.

ಬಣ್ಣ ಬದಲಿಸುವ ಹುಡುಗ ಹುಡುಗಿಯರ ಬಗ್ಗೆ ನನಗೆ ಹೆಚ್ಚು ತಿಳಿಯದು, ಆದರೆ ನಿಜವಾಗಿಯೂ ಪ್ರೀತಿಸುವ ಗೆಳೆಯ ಗೆಳತಿಯರ ಸಂಖ್ಯೆ ಯಾವತ್ತೂ ಮುಗಿಯದು. ನಿನ್ನ ಚಂಚಲ ಮನಸ್ಸು, ನಿನ್ನ ಹಸಿ ಹಸಿ ಸುಳ್ಳು, ಇವೆಲ್ಲವನ್ನೂ ಬದಿಗಿಟ್ಟು ಹೇಳಬೇಕೆಂದರೆ ಇನ್ನೂ ಕೂಡ ಇಷ್ಟೇ ಇಷ್ಟು ಪ್ರೀತಿ ನಿನ್ನೆಡೆಗುಳಿದಿದೆ. ಮುಂದೆ ಅದು ಹೆಮ್ಮರವಾದರೂ ಆಗಬಹುದು. ಸ್ವಾಭಿಮಾನಕ್ಕೆಲ್ಲ ತಿಲಾಂಜಲಿ ಬಿಟ್ಟು ನನ್ನ ಕರಿಯ ನನಗೆ ಬೇಕೂ ಅಂತಾನೆ ಕೊನೆಯ ಸಲ ಕೇಳ್ತ ಇದ್ದೀನಿ, ನನಗೆ ವೆಂಕಟಪ್ಪನ ಗಲೀಜು ಪಾನಿಪುರಿ, ಅರುಣ್ ಐಸ್‌ಕ್ರೀಂ, ಲಿಂಬುಹುಳಿ ಚಾಕಲೇಟ್,ಶುಂಟಿಪೆಪ್ಪರ್‌ಮೆಂಟು, ಬೇಕು. ಮತ್ತೆ ಮತ್ತೆ ಮತ್ತೆ ನನಗೆ ನನ್ನ ಹಳೆಯ ಕರಿಯ ಬೇಕು. ಪ್ಲೀಸ್ ಒಂದು ಸಲ ಸ್ಸಾರಿ ಕೇಳ್ತೀಯ? ಆ ಕ್ಷಣಕ್ಕೆ ನಿನ್ನವಳಾಗ್ತೀನಿ. ಮೆಸ್ಸೇಜ್ ಮಾಡು ಪ್ಲೀಸ್.

ನಿನ್ನ ನವಿಲೂರು ಹುಡುಗಿ.
9986843—