ತುಂಬ ಸಂತೋಷವಾಗಿದ್ದೀನಿ ಅಂದುಕೊಂಡು ಬದುಕುತ್ತಿದ್ದೆ… ನೀನು ನೆನಪಾಗುವವರೆಗೆ !

  ಕ್ಷಮೆ ಇರಲಿ ಗೆಳೆಯ ,

ಕ್ಷಮಿಸಲು ಅರ್ಹಳಲ್ಲದವಳು. ಕ್ಷಮೆ ಇರಲಿ ಗೆಳೆಯ ಅಂದರೆ ನಗುತ್ತೀಯ ಅಲ್ವಾ.. ಜನ ತಪ್ಪು ಮಾಡಿದ್ರೆ ಕ್ಷಮಿಸ್ತಾರೆ. ಆದ್ರೆ ನಾನು ಮಾಡಿದ್ದು ಪಾಪ. ಪಾಪಕ್ಕೆ ಕ್ಷಮೆ ಇಲ್ಲ. ಹಿಂದೆ ಸುತ್ತಿದ್ದು ನಾನು, ಪ್ರೀತಿಸು ಅಂತ ಬೇಡಿಕೊಂಡಿದ್ದು ನಾನು. ನಿನ್ನ ಜೊತೆ ಇರ‍್ತಿನಿ ಅಂತ ಅರ್ಥವಿಲ್ಲದೇ ಇರುವ ಆಣೆ ಪ್ರಮಾಣಗಳನ್ನು ಮಾಡಿದ್ದು ನಾನು. ಯಾವತ್ತೂ ಕಣ್ಣೀರಾಗದವಳು ನಿನಗೋಸ್ಕರ ಕಂಗಳ ಅಣೆಕಟ್ಟು ಒಡೆಯುವಂತೆ ಅತ್ತವಳು ನಾನು. ಸುಳ್ಳಾಡದವಳು ದೇವರಂಥ ಅಮ್ಮನ ಮುಂದೆ ಕೇವಲ ನಿನಗೋಸ್ಕರ ಸುಳ್ಳಾಡಿದವಳು ನಾನು.. ನಿಜ ಹೇಳ್ತೀನಿ ಕಣೋ. ಪ್ರೀತಿಸಿದಷ್ಟು ದಿನ ದೇವರ ಹಾಗೆ ನಿನ್ನ ಪ್ರೀತಿಸಿದ್ದು ಆ ದೇವರಷ್ಟೇ ನಿಜ, ಅಮ್ಮನಷ್ಟೇ ನಿಜ ಅವನು ಬರುವವರೆಗೆ…

ಕೇವಲ ಹಣ, ಅಂತಸ್ತು, ರೂಪಕ್ಕೆ ನಿಜವಾದ ಪ್ರೀತಿಯನ್ನು ಮಾರಿಕೊಳ್ಳುವ ನನ್ನಂಥವರಿಗೆ ಆ ದೇವರು ಸಾವು ಯಾಕೆ ತರಲಿಲ್ಲ ಗೆಳೆಯ? ದೇವರಂಥ ನಿನಗೆ ದ್ರೋಹ ಮಾಡುವ ಮುನ್ನ ಆ ದೇವರು ಯಾಕೆ ತಡೆಯಲಿಲ್ಲ? ಮೂರು ವರ್ಷದ ಪ್ರೇಮವನ್ನು ಕೇವಲ ಆರೆಣಿಕೆ ಸಂಬಳದ ಹುಡುಗನ ಮನೆ ಕಾರು ಕೊಲ್ಲುತ್ತೆ ಅಂದ್ರೆ ಎಂತಹ ದುರ್ಬಲ ಮನಸ್ಸಿನ ಹುಡುಗಿಯನ್ನು ಪ್ರೀತಿಸಿದೆಯೋ ನೀನು. ಸಾವಿನ ಮುಂದೆ ಕೈಯೊಡ್ಡಿ ನಿಂತಿದ್ದೀನಿ. ನನ್ನ ಹಾಗೆ ಸಾವಿಗೂ ಕರುಣೆ ಇಲ್ಲ. ನಿನ್ನ ನೆನಪು ಮಾಡಿಕೊಳ್ಳಲಿಕ್ಕೆ ಅರ್ಹತೆ ಇಲ್ಲದವಳು ಬರೆದ ಈ ಪತ್ರವನ್ನು ನೀನು ಓದುತ್ತೀಯ ಅಲ್ವಾ.. ನೀನು ಓದಲೇಬೇಕು ಕಣೋ. ನಿನ್ನ ಮುಂದೆ ನಿಂತು ನಿನ್ನ ಹೆಸರು ಹೇಳಲೂ ಅರ್ಹತೆ ಕಳೆದುಕೊಂಡವಳು ನಿನಗೆ ಬರೆಯುತ್ತಿರುವ ಕೊನೆಯ ಪತ್ರ ಇದಾದರೂ ಆಗಬಹುದು.

ನಾನು ತುಂ ಸಂತೋಷವಾಗಿದ್ದೀನಿ(?) ಗೆಳೆಯ. ಕೊಟಿಗಳೂ ಕೂಡ ಲೆಕ್ಕ ತಪ್ಪುವ ಗಂಡನಿದ್ದಾನೆ. “ರಾತ್ರಿ” ಮಾತ್ರ ತುಂಬ ಪ್ರೀತಿಸುತ್ತಾನೆ. ಕೈಗೊಬ್ಬ ಕಾಲ್ಗೊಬ್ಬ ಆಳು. ಲಕ್ಷ್ಮಿ ಕಾಲು ಮುರಿದುಕೊಂಡು ನನ್ನ ಮುಂದೆ ಬಿದ್ದಿದ್ದಾಳೆ. ಹೆಸರು ಕುಲ ಗೋತ್ರ ಗೊತ್ತಿಲ್ಲದ ಕಾರುಗಳಲ್ಲೇ ದಿನಾ ಓಡಾಡ್ತೀನಿ. ದಿನಕ್ಕೆ ಲಕ್ಷಾಂತರ ರುಪಾಯಿಗಳಷ್ಟು ಷಾಪಿಂಗ್. ಕ್ರೆಡಿಟ್ ಕಾರ್ಡ್‌ಗಳಲ್ಲೇ ವ್ಯವಹಾರ. ನನಗೆ ಪ್ರೀತಿ ಬೇಕು ಅನಿಸಿದಾಗಲೆಲ್ಲ ಅದೆಲ್ಲಿಂದಲೋ ದುಡ್ಡು ತಂದು ಸುರಿಯುತ್ತಾನೆ. ಬಡತನವನ್ನೆಲ್ಲ ಸಿರಿವಂತ ಗಂಡನ ತೋಳ ತೆಕ್ಕೆಯಲ್ಲಿ, ಅವನ ಹಣದ ಕಟ್ಟುಗಳ ಕೆಳಗೆ ತುಳಿದು ಹಾಕುತ್ತಿದ್ದೀನಿ. ತುಂಬ ಸಂತೋಷವಾಗಿದ್ದೀನಿ ಅಂದುಕೊಂಡು ಬದುಕುತ್ತಿದ್ದೆ ನೀನು ನೆನಪಾಗುವವರೆಗೆ.

ಬದುಕು ಅಂದರೆ ಕೇವಲ ದುಡ್ಡಲ್ಲ ಅಂತ ಗೊತ್ತಾಗಲಿಕ್ಕೆ ತುಂಬ ಸಮಯ ಬೇಕಾಗಲಿಲ್ಲ. ಗಂಡ ಅನ್ನಿಸಿಕೊಂಡವನು ರಾತ್ರಿ ಮಾತ್ರ ಪ್ರೀತಿಸುವಾಗ ಯಾಕೋ ನೀನು ನೆನಪಾಗುತ್ತಿದ್ದೆ. ನೀನು ಪ್ರೀತಿಸುದಷ್ಟು ದಿನ ಅಮ್ಮನ ನೆನಪೇ ಆಗದಷ್ಟು ಪ್ರೀತಿಸಿದವನು ನೀನು. ನಾನೇ ಹದ್ದುಮೀರಿ ನಡೆದುಕೊಂಡರೂ ಸಂಯಮದ ಪಾಟ ಕಲಿಸುತ್ತಿದ್ದವನು ನೀನು. ನಿನ್ನ ದೂರ ಮಾಡಿಕೊಂಡು ಕೋಟಿ ಬಂಗಲೆಯೊಳಗೆ ಬಂದಮೇಲೆ ನಿನ್ನ ನೆನಪಾಗಲಿಕ್ಕೆ ತುಂಬ ದಿನ ಬೇಕಾಗಲಿಲ್ಲ. ದುಡ್ಡು ಮಾತ್ರ ಸುಖ ತರುವುದಿಲ್ಲ ಅನ್ನುವ ಸತ್ಯ ನನ್ನಂಥ ಹುಡುಗಿಯರಿಗೆ ನಿನ್ನಂಥ ಹುಡುಗರನ್ನು ಕಳೆದುಕೊಂಡ ಮೇಲೆಯೇ ಗೊತ್ತಾಗಬೇಕು. ಹೇಗಿದ್ದೀಯೋ ಎಲ್ಲಿದ್ದೀಯೊ ಅನ್ನುವುದು ಗೊತ್ತಾಗದೇ ಈ ಪತ್ರ ಬರೆಯುತ್ತಿದ್ದೀನಿ. ಪತ್ರ ಓದಿ ಅಸಹ್ಯ ಪಟ್ಟುಕೊಳ್ಳಬೇಡ ಪ್ಲೀಸ್. ಪ್ರತಿ ಸಲ ತಪ್ಪು ಮಾಡಿದಾಗಲೂ ಕ್ಷಮಿಸುತ್ತಿದ್ದ ಹಾಗೆ ಕೊನೆಯ ಸಲ ಕ್ಷಮಿಸಿಬಿಡು. ಸರಿ, ಅವನು ಬರುವ ಹೊತ್ತಾಯ್ತು. ರಾತ್ರಿ ತುಂಬ ಪ್ರೀತಿಸುತ್ತಾನೆ. ಅವನು ಪ್ರೀತಿಸುವಾಗ ನನ್ನ ಕಣ್ಣಲ್ಲಿ ನೀರಿರುತ್ತೆ. ಅಲ್ಲಿ ನೀನಿರುತ್ತೀಯ.

ಕ್ಷಮೆ ಇರಲಿ ಗೆಳೆಯ

ನಿನ್ನ ಚೋಮಿ..:(