ಪತ್ರದ ಜೊತೆ ಒಂದೆರೆಡು ಮುತ್ತುಗಳಿರಲಿ

27 ಏಪ್ರಿಲ್

ಸಂಪಿಗೆ ಮೂಗಿನ ಹಸಿರು ದಾವಣಿಯ ನನ್ನ ಅಂತರಂಗದ ಗೆಳತಿಗೆ ನಿನ್ನ ಪ್ರೇಮದ ಗೆಳೆಯ ಕೊಡುವ ಮತ್ತು ಬೇಡುವ ಸಿಹಿ ಸಿಹಿ ಮುತ್ತುಗಳು. ನಾನು ಕ್ಷೇಮ ನೀನು ಕ್ಷೇಮವೆಂದು ನಿನ್ನ ಪತ್ರದಿಂದ ತಿಳಿಯಿತು, ತಿಳಿಸುವುದೇನೆಂದರೆ, ನಾನು ನಿನ್ನಂತರಂಗದ ಒಲವಿನ ನೆನಪುಗಳಲ್ಲಿ ಸದಾ ಖುಷಿಯಾಗಿದ್ದೆ, ಖುಷಿಯಾಗಿದ್ದೇನೆ ಮತ್ತು ಖುಷಿಯಾಗಿರುತ್ತೇನೆ. ಮತ್ತೆ ನೀನು ಹೇಗಿದ್ದೀಯಾ? mooಗಿನ ತುದಿಯಲ್ಲಿ ಮೊದಲಿನಂತೆ ಕೊಪದ ಜ್ವಾಲಾಮುಖಿ ಆಗಾಗ ಚಿಮ್ಮುತ್ತಿದೆಯೇ? ನಿನ್ನ ಮಲ್ಲಿಗೆ ಜಡೆ ಈಗಲೂ ನಿನ್ನ ಮನೆಯ ಅಂಗಳದ ಅಂಚನ್ನು ಇಷ್ಟಿಷ್ಟೇ ತಾಕುತ್ತಿದೆಯೇ? ನಿನ್ನ ತುಟಿಗಳಲ್ಲಿರುವ ನನ್ನ ನಗು ಸ್ವಲ್ಪವೂ ಮಾಸಿಲ್ಲ ತಾನೆ? ನನ್ನ ಹೆಸರಿನ ನಿನ್ನ ಕೊಟ್ಟಿಗೆಯ ಕರುವನ್ನ ದಿನಕ್ಕೆಷ್ಟು ಬಾರಿ ಮುದ್ದಾಡಿ ಬರುತ್ತೀ ಮುದ್ದುಗಿಣಿ? ನೀನು ರಾತ್ರಿಪುರ ತಬ್ಬಿ ಮಲಗುವ ಬೆಕ್ಕಿನ ಮುದ್ದುಮರಿಗೆ ನನ್ನ ಹೆಸರಿಟ್ಟ ಔಚಿತ್ಯವೇನೆಂದು ಪ್ರಶ್ನಿಸಬಹುದೇ? ಪಿತೃ ಸಮಾನರಾದ ನಿಮ್ಮ ತಂದೆಯವರಿಗೆ ವಾಸುವಿನ ಒಲವನ್ನ ತಿಳಿಸುವ ಘಳಿಗೆಯನ್ನ ಪಕ್ಕದ ಮನೆಯ ಸುಬ್ರಾಯ ಭಟ್ಟರನ್ನ ಕೇಳಿ ಆಯಿತೆ? ಮನೆ ಮುಂದಿನ ಗೋರಂಟೀ ಗಿಡಕ್ಕೆ ನನ್ನ ನಮಸ್ಕಾರವನ್ನ ಹಿಂದಿನ ಪತ್ರದಲ್ಲೆ ತಿಳಿಸಿದ್ದೆ ಅದಕ್ಕೆ ತಲುಪಿಸಿದೆಯಾ? ನನ್ನ ಕೈಗಳಿಂದ ನಿನ್ನ ಮುದ್ದಾದ ಕೈಗೆ ಬಣ್ಣ ತುಂಬಿದ ಮುದ್ದಾದ ಗಿಡ ಅದು. ಅದಕ್ಕೆ ನನ್ನ ನಮಸ್ಕಾರಗಳು ಸಂದಾಯವಾಗಲೇ ಬೇಕು ಅದಕ್ಕಾಗಿ ಮತ್ತೊಮ್ಮೆ ನೆನಪಿಸುತ್ತಿದ್ದೇನೆ.

ನನ್ನ ಟ್ರಂಕ್ ಕಾಲ್ ಗೆ ನೀನು ತೋಟದ ಮನೆಯ ಮಾರಪ್ಪಣ್ಣನ ಮನೆಗೆ ರಾತ್ರಿ ಓಡಿ ಬರುವಾಗ ಜಾರಿ ಬಿದ್ದು ಮಂಡಿ ತರಚಿಸಿಕೊಂಡಿರುವುದು ತಿಳಿಸಿದ್ದೆ ವಿಷಯ ತಿಳಿದು ನನಗೇ ನೋವಾದಷ್ಟು ನೋವಾಯಿತು. ಈಗ ಆ ಪೋನು ಹಾಳಾಗಿದೆ ಎಂದು ತಿಳಿದು ತುಂಬಾ ಕುಷಿಯಾಯಿತು. ಮಂಡಿ ತರಚಿಕೊಂಡಾಗ ತ್ಯಾಂಪಣ್ಣನ ನೋವಿನೆಣ್ಣೆಯನ್ನು ಹಚ್ಚಿ ಬಿಸಿ ನೀರು ಹಾಕುತ್ತಿದ್ದೆ ಹಾಗೆ ಕದ್ದು ಒಂದು ಮುತ್ತು ಕೂಡ(ಮುಖ ತಿರುಗಿಸ ಬಾರದು)

ದೇವಕಿ ನನಗೀಗಲು ರತ್ನಮ್ಮನ ಹೋಟೇಲಿನ ಪಡ್ಡು ತಿನ್ನುವ ಆಸೆಯಾಗುತ್ತಿದೆ ಖಾರದ್ದು ಮತ್ತು ಸಿಹಿಯದ್ದು, ಸಿಹಿನೇ ಇಷ್ಟ ನೀನು ಕಚ್ಚಿ ಕೊಡ್ತಿದ್ಯಲ್ಲ ಅದು ಇನ್ನು ಇಷ್ಟ…… ಏನು ಮಾಡಲಿ? ಸೊಂಪಾಗಿ ಬೆಳೆದ ಜಾರಿಗೆ ಮರದಲ್ಲಿ ಇಬ್ಬರು ಹತ್ತಿ ಕುಳಿತು ಅರ್ಧ ದಿನ ಕಳೆದದ್ದು ಈಗಲು ನಗು ತರಿಸುತ್ತಿದೆ, ನೀನು ಬರೆಯುವ ಮುಂದಿನ ಪತ್ರದಲ್ಲಿ ಉತ್ತರದ ಸಮೇತ ನಿನ್ನ ಮಲ್ಲಿಗೆಯ ನಗುವನ್ನ ರವಾನೆ ಮಾಡತಕ್ಕದ್ದು, ನೀನು ಇಷ್ಯೀ ಥೂ ಕೊಳಕಾ…ಅಂದರೂ ಚಿಂತೆಯಿಲ್ಲ ಪತ್ರದ ಜೊತೆ ಒಂದೆರೆಡು ಮುತ್ತುಗಳಿರಲಿ, ಎರಡು ಬೇಕು, ಮೂರು ಸಾಕು ಅನ್ನುವ ಒಪ್ಪಂದದಲ್ಲಿ ಯಾವುದೇ ಬದಲಾವಣೆಯಿರುವುದಿಲ್ಲ ಹಾಗೂ ನಮಗೆ ಗಂಡು ಮಗುವಾದರೇ ಭೀಮಸೇನ ಅಂತಲೂ ಹೆಣ್ಣುಮಗುವಾದರೇ ಹೇಮಾವತಿ ಅಂತಲೂ ಹೆಸರಿಡುವ ನಿನ್ನ ಜೊತೆಗಿನ ನನ್ನ ಜನ್ಮ ಸಿದ್ಧ ಹೋರಾಟದಂತಹ ಮಾತಿನಲ್ಲಿ ಯಾವುದೇ ಬದಲಾವಣೆಯಿರುವುದಿಲ್ಲ. ಹಾಗು ನಿಮ್ಮ ತಂದೆಯವರು ನಮ್ಮ ಮದುವೆಗೆ ಒಪ್ಪಿಗೆ ಸೂಚಿಸಲಿ ಎಂದು ಹನುಮಂತ ದೇವರ ಗುಡಿಗೆ ಹೋಗಿ ಪೂಜೆ ಮಾಡಿಸಿಕೊಂಡು ಬರತಕ್ಕದ್ದು, ಪೂಜೆ ಮಾಡಿಸಿಕೊಂಡು ಬಂದ ಕುಂಕುಮ, ವಿಬೂತಿ, ಮತ್ತು ಸ್ವಲ್ಪ ಅಕ್ಕಿಕಾಳುಗಳನ್ನ ಪತ್ರದ ಜೊತೆ ಕಳುಹಿಸತಕ್ಕದ್ದು. ಮತ್ತು ಪತ್ರದ ಮೊದಲಿಗೆ ಪ್ರೀತಿಯ ಪತಿದೇವರಿಗೆ ಪ್ರೀತಿಯ ಸವಿಮುತ್ತುಗಳು ಎಂಬ ಒಕ್ಕಣೆಯನ್ನ ಕಡ್ಡಾಯವಾಗಿ ನಮೂದಿಸತಕ್ಕದ್ದು.

ಆದಷ್ಟು ಬೇಗ ನಿನ್ನನ್ನು ಬಂದು ಸೇರಿಕೊಳ್ಳುತ್ತೇನೆ. ಗೋರಂಟೀ ಗಿಡದ ಹಳೆಯ ಬಾಕಿಗಳನ್ನೆಲ್ಲ ತೀರಿಸಿಬಿಡುತ್ತೇನೆ ಕೊಳಕ ಇಷ್ಯೀ.. ಅನ್ನುತ್ತ ನೀನು ಮಾರುದ್ದ ದೂರ ಹೋಗಿ ಮಲ್ಲಿಗೆ ಗಿಡದ ಬಳಿ ನಿಲ್ಲುವುದನ್ನು ಇಲ್ಲಿಯೇ ಕುಳಿತು ಕಲ್ಪಿಸಿಕೊಂಡು ಮತ್ತಷ್ಟು ನಿನ್ನನ್ನ ಕಾಡಬೇಕೆಂದು ಮನಸ್ಸಿನಲ್ಲೆ ಅಂದುಕೊಳ್ಳುತ್ತಿದ್ದೇನೆ. ಕೇವಲ ನಿನ್ನ ಪಡೆಯೋದಕ್ಕೋಸ್ಕರ ಈ ಡಾಲರುಗಳ ಊರಿನಲ್ಲಿ ಬಂದು ಕೆಲವೊಮ್ಮೆ ನಿನ್ನ ನೆನಪಾಗಿ ಬಿಕ್ಕಳಿಸುತ್ತೇನೆ..ಆದಷ್ಟು ಬೇಗ ನಿನ್ನನ್ನ ಸೇರುತ್ತೇನೆಂಬ ವಿಶ್ವಾಸ ಎಲ್ಲಾ ವಿರಹಗಳನ್ನೆಲ್ಲ ದೂರ ಮಾಡುತ್ತಿದೆ. ಬರಿಯೊದಕ್ಕೆ ತುಂಬಾ ಇದೆ ಈಗಾಗಲೆ ಮನಸ್ಸು ನಿನ್ನ ಪತ್ರದ ನಿರಿಕ್ಷೆಯ ಬೆನ್ನು ಹತ್ತಿ ಕುಳಿತಿದೆ. ಸದ್ಯಕ್ಕೆ ಪತ್ರ ಮುಗಿಸುತ್ತಿದ್ದೇನೆ.. ಆದಷ್ಟು ಬೇಗನೇ ಪತ್ರ ಬರೆಯತಕ್ಕದ್ದು. ಬೇರೇನು ವಿಶೇಷವಿಲ್ಲ ಇದ್ದರೆ ನಿನ್ನ ಪತ್ರ ನೋಡಿ ಬರೆಯುತ್ತೆನೆ..:)

ಪ್ರತಿ ಪತ್ರಗಳು ಕೊನೆಕೊನೆಗೆ ಕಣ್ಣೀರಿನಿಂದ ತೊಯ್ದು ಅಕ್ಷರಗಳೇ ಕಾಣದಾಗುತ್ತವೆ.

27 ಏಪ್ರಿಲ್

ಪ್ರೀತಿಯಲ್ಲಿ ಹೇಳಿಕೊಂಡಿದ್ದನ್ನ ಮತ್ತು ಹೇಳಿಕೊಳ್ಳಲಾಗದೇ ಇದ್ದಿದ್ದನ್ನ ಒಂದು ತಕ್ಕಡಿಯಲ್ಲಿ ಹಾಕಿ ತೂಗಿದರೆ ಹೇಳಿಕೊಳ್ಳಲಾಗದ್ದೇ ಹೆಚ್ಚು ತೂಗುತ್ತಂತೆ ನಿಜವಾ? ಬಹುಶ ಈ ಪತ್ರವನ್ನ ಓದಿದ ಮೇಲೆ ನಿನಗೆ ನನ್ನ ಮಾತು ನಿಜವನ್ನಿಸಿದರೂ ಅನ್ನಿಸಬಹುದು. ಅಥವ ಇವನೊಬ್ಬ ಸುಳ್ಳ ಅಂತನೂ ಅನ್ನಿಸಿ ಪತ್ರವನ್ನ ಹರಿದೆಸೆದು ನಿರ್ಲಪ್ತತೆಯಿಂದ ಸುಮ್ಮನಿದ್ದುಬಿಡಬಹುದು. ನಿಜ ದೇವಕಿ, ನಿನ್ನ ಮುಂದೆ ಇಲ್ಲಿಯವರೆಗೂ ಹೇಳಲಾರದ ಸಣ್ಣ ಸಣ್ಣ ಸಂಗತಿಗಳು ತುಂಬಾನೆ ಇವೆ. ಸಣ್ಣ ಸಂಗತಿಗಳಾದರೂ ಅದರಲ್ಲಿ ತುಂಬು ಪ್ರೀತಿಯ ಸಾರ್ಥಕತೆ ಇದೆ. ನಿಜವಾದ ಪ್ರೇಮಿಗಳಿಗೆ ಸಣ್ಣ ಸಣ್ಣ ಸಂಗತಿಗಳೂ ಕೂಡ ಬೆಟ್ಟದಷ್ಟು ದೊಡ್ಡದಾದ ನೆಮ್ಮದಿಯನ್ನ ಕೊಡುತ್ತವಂತೆ.

ನಿಜ ಹೇಳ್ತ ಇದ್ದೀನಿ ಕೆಲವೊಮ್ಮೆ ನಿನ್ನ ಹಣೆಗೊಂದು ಮುತ್ತು ಕೊಡಬೇಕೆನ್ನಿಸುತ್ತಿತ್ತು. ಅವಕಾಶ ಸಿಕ್ಕಿದಾಗಲೆಲ್ಲ ನಿನ್ನನ್ನ ಯಾವತ್ತೂ ದೂರಾಗದ ಹಾಗೆ ಗಟ್ಟಿಯಾಗಿ ತಬ್ಬಿಹಿಡಿದು ಕುಳಿತುಬಿಡಬೇಕು ಅನ್ನಿಸುತ್ತಿತ್ತು. ನೂರಾರು ಕಿಲೋಮೀಟರುಗಳ ದೂರವನ್ನ ಒಂದೇ ಒಂದು ಮಾತನಾಡದೆ ನಿನ್ನ ಕಿರುಬೆರಳ ಹಿಡಿದು ನಡೆಯಬೇಕೆನ್ನಿಸುತ್ತಿತ್ತು. ಸುರಿವ ಸ್ವಾತಿ ಮಳೆಯಲ್ಲಿ ನಾನೆ ನಿನ್ನ ಭುಜಕ್ಕೊರಗಿಕೊಂಡು ಪ್ರೇಮಕವಿ ಕೆ.ಎಸ್.ಎನ್ ಅವರ ಒಂದು ಪೂರ್ತಿ ಕವಿತೆಯನ್ನ ನಿನಗೆ ಓದಿಹೇಳಬೇಕೆನ್ನಿಸಿದ್ದು ಸುಳ್ಳಲ್ಲ. ಇದ್ದಕ್ಕಿದ್ದಂತೆ ಕಣ್ಮುಚ್ಚಿ ಉಸಿರು ಕಟ್ಟಿದ ಹಾಗೆ ನಾಟಕವಾಡಿ ನೀನು ಗಾಬರಿ ಬೀಳೋದನ್ನ ಕದ್ದು ನೋಡಿ ನೀನೆಷ್ಟು ಪ್ರೀತಿಸುತ್ತಿಯ ಎಂದು ನಿನ್ನ ಕಿವಿಯಲ್ಲಿ ಹೇಳಿ ಕಣ್ಣು ತುಂಬಿಕೊಳ್ಳಬೇಕೆನ್ನಿಸುತ್ತಿತ್ತು. ದೇವರ ಸನ್ನಿಧಿಯಲ್ಲಿ 3 ಸುತ್ತಿನ ಬದಲು ಮೂವತ್ಮೂರು ಸುತ್ತುಗಳನ್ನ ನಿನ್ನನ್ನ ಹೊತ್ತು ತಿರುಗಿಸಬೇಕೆನ್ನಿಸುತ್ತಿತ್ತು. ಸನಿಹವಿದ್ದಾಗ ನಿನ್ನ ಪ್ರೀತಿಯನ್ನ ದೂರವಿದ್ದಾಗ ನಿನ್ನ ವಿರಹವನ್ನ ಮನಸಾರೆ ಅನುಭವಿಸುವ ಆಸೆಯಾಗುತ್ತಿತ್ತು.

ಹೇಳೋಕೆ ತುಂಬಾನೆ ಇದೆ ದೇವಕಿ. ಕೆಲವು ಕಾರಣಗಳು ನಿನಗೆ ಸಿಲ್ಲಿ ಅನ್ನಿಸಬಹುದು. ಆದರೇ ಕೇವಲ ಭಾವನೆಗಳಲ್ಲೆ ಬದುಕುವ ನನ್ನಂತವರ ಪಾಲಿಗೆ ಈ ಸಣ್ಣ ವಿಷಯಗಳು ಸಣ್ಣ ವಿಷಯಗಳೇನು ಅಲ್ಲ. ಹೀಗೆ ನಿನ್ನ ಬಗ್ಗೆ ಏನೇ ಬರೆದರೂ ಅದು ಯಾಕೋ ಪ್ರೀತಿಯಲ್ಲೇ ಮುಕ್ತಾಯವಾಗುತ್ತದೆ. ಪ್ರತಿ ಪತ್ರಗಳು ಕೊನೆಕೊನೆಗೆ ಕಣ್ಣೀರಿನಿಂದ ತೊಯ್ದು ಅಕ್ಷರಗಳೇ ಕಾಣದಾಗುತ್ತವೆ. ಈ ಅಸಹಾಯಕತೆಗೆ ಏನನ್ನಲಿ?

ಹೆಜ್ಜೆಗಳು ಕೇಳಿದ ಪ್ರಶ್ನೆಗೆ ಉತ್ತರಿಸದವನು !

4 ಫೆಬ್ರ

ಈ ಎದೆಯೊಳಗಿನಿಂದ
ಜಾರಿ ಬೀಳುತ್ತಿರುವ
ಒಂದೊಂದು ನೆನಪುಗಳಿಗೂ
ಕಾಲಿಗೆ ಬಿದ್ದವನು..!

ಆತ್ಮಸಾಕ್ಷಿಗೆ ಪೆಟ್ಟಾಯಿತೆಂದು
ಮತ್ತೆ ಎದ್ದು ನಿಂತು
ಬಲವಂತದ ನಗು ಮೊಗ ಹೊತ್ತವನು..!

ಮತ್ತೆ ಉತ್ತರಿಸಿಕೊಂಡು
ಬಂದ ನಿನ್ನ ನೆನಪುಗಳಿಗೆ
ಶರಣಾಗಿ ಸೋತೆನೆಂದವನು..!

ನೀನು ಮಾಡಿದ ಎಲ್ಲಾ
ಗಾಯಗಳಿಗೂ ನಿನ್ನ ಪ್ರೀತಿಯ
ಮುಲಾಮು ಹಚ್ಚಿದವನು,
ಮತ್ತೆ ಎಲ್ಲ ಗಾಯಗಳಿಗೂ
ನನ್ನ ಗೆಳತಿಯ ಮಚ್ಚೆಗಳೆಂದು
ಹೊಸ ಹೆಸರನಿಟ್ಟವನು..!

ಜೊತೆ ನಡೆದ ೩
ಹೆಜ್ಜೆಗಳನ್ನೆ ೩
ಜನ್ಮಗಳು ಅಂದುಕೊಂಡವನು.
ನೀನಿಲ್ಲದೇ ಒಂಟಿಯಾದ
ಈ ಹೆಜ್ಜೆಗಳು ನಿನ್ನ ಕುರಿತಾಗಿ
ಕೇಳಿದ ಪ್ರಶ್ನೆಗಳಿಗೆ
ಉತ್ತರಿಸಲಾಗದೇ ಸೋತವನು

ನೀನೊಂತರ ಪುಣ್ಯಕೋಟಿಯ ಹಾಗೆ ಬೆಂಕಿಯಲ್ಲಿ ಅರಳಿದ ಹೂವು ಕಣೆ

3 ಫೆಬ್ರ

ಹಾಯ್ ಬಂಗಾರ, ನನ್ನ ಹೃದಯದ ಅರಸಿ,ನಾನಿಲ್ಲಿ ಚಕ್ರವಾಕ ಪಕ್ಷಿತರ ನಮ್ಮೂರ ಕಲ್ಯಾಣಿ ಹತ್ರ ನೀನೊಬ್ಳೆ ಬರ್ತೀಯ ಅಂತ ಕಾಯ್ತ ಇದ್ರೆ ನೀನ್ ಮಾತ್ರ ನಿಮ್ “ಚಿಕ್ಕಮ್ಮಹೆಳವನಕಟ್ಟೆ ಗಿರಿಯಮ್ಮ ಜೊತೆ ಬರೋದ? ಒಳ್ಳೆ ಮನೆತನದಿಂದ ಬಂದ ಹುಡುಗ ಕಣಮ್ಮ ನಾನು, ಅವರೆಲ್ಲಾದ್ರು ನನ್ನನ್ನ ನೋಡಿದ್ರೆ ನಮ್ಮ ಸಂಬಂಧ ಮೊದ್ಲಿನ್‌ತರ ಉಳಿತಾ ಇತ್ತಾ ಹೇಳು? ಪ್ಲೀಸ್ ಈ ಹೃದಯಸಾಕ್ಷಿಯಾಗಿ ಪ್ರೀತಿಯಿಂದ ಹೇಳ್ತಾ ಇದ್ದೀನಿ, ನನ್ನ ನಾಳೆಯ ಬದುಕು ಅನ್ನುವ ಪುಸ್ತಕದಲ್ಲಿ ನಿನ್ನ ಪ್ರೀತಿಯ ಜೋಗುಳ ಇರಲೇಬೇಕು, ನೀನಡೆವ ಹಾದಿಯಲ್ಲಿ ಒಲುಮೆಗೀತೆ ಹಾಡ್ತ ನಿನ್ನ ಹೆಜ್ಜೆಗಳಿಗೆ ನಾನು ಬೆಳಕು ತರ್ತೀನಿ.

ನೀನು ನನ್ನ ಜೊತೆ ಇಲ್ಲದ ದಿನಕ್ಕೆ ಗ್ರಹಣ ಹಿಡಿದ ಹಾಗಾಗುತ್ತೆ, ಇಲ್ಲಿರುವುದು ಸುಮ್ಮನೆ ಅನ್ನುವ ಸತ್ಯ ಅನಾವರಣವಾಗುತ್ತೆ, ಪ್ರತಿ ದಿನ ನೀನು ನನ್ನ ಜೀವನದಲಿ ಯಾವತ್ತೂ ಅಳಿಸಲಾಗದಂತಹ ಪ್ರೀತಿಯ ರಂಗೋಲಿ ಬಿಡಿಸುತ್ತಿರಬೇಕು ಚಿನ್ನ, ಆದ್ರೆ ಯಾಕ್ ನೀನು ನನ್ನ ಪಾಲಿನ ಗುಪ್ತಗಾಮಿನಿಯಾಗಿ ಹರಿತಾ ಇದ್ದೀಯಾ? ನೀನ್ ತಿಳ್ಕೊಂಡ ಹಾಗೆ ಅಂಬಿಕ, ಪಾರ್ವತಿ, ಸಾವಿತ್ರಿ, ಚಿತ್ರಲೇಖ, ಲಕುಮಿ ಇವರೆಲ್ಲರೂ ಜಸ್ಟ್ ನನ್ನ ಕ್ಲಾಸ್‌ಮೇಟ್ಸ್ ಅಷ್ಟೇ ಕಣೆ, ನಾನ್ ಸುಳ್ಳು ಹೇಳ್ತಿಲ್ಲ, ಬೇಕಾದ್ರೆ ಬನಶಂಕರಿ ದೇವಿಯ ಮೇಲೆ ಆಣೆ ಮಾಡ್ತೀನಿ. ನಿನಗೆ ಹೇಳದೇ ಇಲ್ಲಿಯವರೆಗೂ ನಾನ್ ಮಾಡಿದ ಒಂದೇ ಒಂದು ತಪ್ಪು ಅಂದ್ರೆ ಪಕ್ಕದ ಮನೆ ಸುಂದ್ರಿ ಸೀತೆಜೊತೆ ಅರುಂಧತಿ ಸಿನಿಮಾದ ಸೆಕೆಂಡ್ ಷೋಗೆ ಹೋಗಿದ್ದು.ನಮ್ಮಿಬ್ಬರ ಬಗ್ಗೆ ನಿನಗೇನಾದ್ರು ಸಣ್ಣ ಅನುಮಾನ ಇದ್ಯಾ? ಸರಿ ಇನ್ ಮೇಲೆ ನಾನು ಅವಳು ಅಣ್ಣತಂಗಿ ಸರಿನಾ?ನಂಬಿಕೆ ಬಂತಾ?ಈಗ್ಲಾದ್ರೂ ಸ್ವಲ್ಪ ನಗು ಮರಾಯ್ತಿ, ನನ್ ಮನಸ್ಸಿಗೂ ಸ್ವಲ್ಪ ತಂಗಾಳಿ ಬೀಸಿದ ಹಾಗಾಗ್ಲಿ.

ನನ್ನ ನೋವುಗಳಿಗೆ ಕಾರಣ ಯಾರೇ ಇರಲಿ ಕಣೆ, ಆದ್ರೆ ನನ್ನ ನಲಿವುಗಳಿಗೆ ಪ್ರೇರಣ ಶಕ್ತಿ ಎಲ್ಲ ನೀನೆ.ನಿನ್ನ ಪರಿಚಯವಾಗಿ ಕೇವಲ ನೂರು ದಿನಗಳು ಅಷ್ಟೆ, ಈಗಾಗ್ಲೆ ಸಾವಿರ ಸಾವಿರ ಜನ್ಮದ ಪ್ರೀತಿ ಹೇಳುವ ಆಸೆ ನನಗಾಗ್ತಿದೆ, ಇದು ಯಾವಜನ್ಮದ ಮೈತ್ರಿಕಣೋ? ನೀನು ನನ್ನ ಮೇಲೆ ಮಾಡಿರುವ ಎಲ್ಲ ಆಪಾದನೆಗಳಿಂದಲೂ ಒಂದಲ್ಲ ಒಂದು ದಿನ ಮುಕ್ತನಾಗೇ ಆಗ್ತೀನಿ, ನಿನ್ನ ಪ್ರೀತಿ ಇಲ್ಲದ ಮೇಲೆ ನಾನು ಏನಾಗ್ತೀನೋ ಅನ್ನೋ ಭಯ ಶುರುವಾಗ್ತಿದೆ, ಪ್ಲೀಸ್ ನನ್ನ ಬಿಟ್ಟು ಹೋಗ್ಬೇಡ, ನಿನ್ನಿಷ್ಟದಂತೆ ಯಂಡಮೂರಿ ಅವರ ಕನ್ನಡ ಅನುವಾದ ಪುಸ್ತಕಗಳನ್ನ ನಿನಗೆ ತಂದುಕೊಡ್ತೀನಿ, ನಿನ್ನಿಷ್ಟದ ಗೆಜ್ಜೆಪೂಜೆ: ಸಿನಿಮಾ ಕರ್ನಾಟಕದ ಯಾವ ಟೆಂಟಲ್ಲಿದ್ರೂ ನಿನ್ನ ಕರೆದುಕೊಂಡು ಹೋಗಿ ತೋರಿಸ್ತೀನಿ, ನೀನು ಪ್ರೀತಿಸುವ ಸೂರ್ಯಕಾಂತಿ ಹೂವನ್ನ ತಂದು ನಿನ್ನ ಮುಡಿಗೆ ಮುಡಿಸ್ತೀನಿ.

ನೀನೊಂತರ ಪುಣ್ಯಕೋಟಿಯ ಹಾಗೆ ಬೆಂಕಿಯಲ್ಲಿ ಅರಳಿದ ಹೂವು ಕಣೆ.ಯಾರು ಬೇಕಾದ್ರೂ ನಿನಗೆ ಮೋಸ ಮಾಡ್ಬೋದು ಸ್ವಲ್ಪ ಹುಷಾರಾಗಿರು. ಪಕ್ಕದ ಮನೆ ಪಾಂಡುರಂಗವಿಠಲ ಅಂಕಲ್, ಸಂಕ್ರಾತಿ ಬಾರ್ ಅಂಡ್ ರೆಸ್ಟೋರೆಂಟಿನ ಕ್ಯಾಷಿಯರ್ ಪಾಪ ಪಾಂಡು, ನಿನ್ನ ಮುಂದೆ ಪ್ರೀತಿಯ ಗಾಳಿಪಟ ಹಾರಿಸ್ಕೊಂಡು ನಿನ್ನ ಕುತ್ತಿಗೆಗೆ ಮಾಂಗಲ್ಯ ಕಟ್ಟೋಕೆ ರೆಡಿ ಆಗ್ತಿದ್ದಾರೆ,ಆದ್ರೆ ಆ ಬಗವಂತ ನೀವಿಬ್ರು ಪಾರ್ವತಿ ಪರಮೇಶ್ವರರ ಹಾಗೆ ಕೃಷ್ಣ ರುಕ್ಮಿಣಿಯ ಹಾಗೆ ಅಂತ ತೀರ್ಮಾನಿಸಿಯಾಗಿದೆ,ಗೋಧೂಳಿ ಮುಹೂರ್ತದಲ್ಲಿ ಇಬ್ರು ಮದ್ವೆ ಆಗೇ ಬಿಡೋಣ, ನಮ್ಮ ಮನೆ ದೇವತೆಯಾದ ಅಮ್ಮ ನಾಗಮ್ಮನ ಆಶೀರ್ವಾದ ನಮ್ಮ ಮೇಲೆ ಇದ್ದೇಇದೆ, ನೂರು ಕಾಲ ಚನ್ನಾಗಿರಿ ಅಂತ ಹಾರೈಸೋಕೆ ನಮ್ಮ ಗುರುರಾಘವೇಂದ್ರ ಸ್ವಾಮಿಗಳು ಇದ್ದೇ ಇದ್ದಾರೆ, ಪ್ರೀತೀನ ಯಾವತ್ತೂ ಮಾಯಾಮೃಗ ಅಂದ್ಕೊಬಾರದು ಗೆಳತಿ,ಅದೊಂದು ಹೊಸ ಚಿಗುರು ತರ, ಪ್ರಾಮಾಣಿಕತೆಯಿಂದ ಬೆಳಸಿದ್ರೆ ಹೆಮ್ಮರವಾಗುತ್ತೆ, ಅದೇ ಮರದಲ್ಲಿ ನಾನು ನೀನು ಹಾಗು ನಮ್ಮವೆರಡು ಮಕ್ಕಳು ಜೋಕಾಲಿ ಆಡಬಹುದು.

ನಮ್ ಕುಟುಂಬದ ಬಗ್ಗೆ ನೀನ್ ಯೋಚನೆ ಮಾಡೋದೆ ಬೇಡ, ನಿನ್ನ ಪಕ್ಕದಲ್ಲಿ ನಿಲ್ಲಿಸ್ಕೊಂಡು ಅಮ್ಮ ನಿನಗಾಗಿ ಏನ್‌ತಂದಿದ್ದೀನಿ ನೋಡು ಅಂದ್ರೆ ಗೋಕುಲನಿವಾಸದೊಳಗಿಂದ ನಮ್ಮ ತಾಯವ್ವ ಹೊರಗೆ ಬಂದು ನಮ್ಮ ನಮ್ಮ ಮನೆಗೆ ನಮ್ಮ ಮನೆ ಮಗಳು ಬಂದ್ಲು ಅಂತ ನಿನ್ನ ಮನೆ ತುಂಬಿಸಿಕೊಂಡು ಬಾಗಿಲ ಮುಂದೆ ಕಾರ್ತೀಕ ದೀಪ ಹಚ್ಚುತ್ತಾಳೆ. ನಿನಗೆ ಕುಂಕುಮ ಬಾಗ್ಯ ಸಿಕ್ತು ಅಂತ ಕನ್ನಡಿ ನೋಡ್ಕೊಂಡು ನನ್ನ ಮರೆತು ಬಿಡಬೇಡ ಪ್ರೀತಿಯ ಪಾರಿಜಾತವೆ..:)

ನಿನ್ನೊಲುಮೆಯಿಂದಲೇ

ನವಿಲೂರ ಹುಡುಗ

ನನ್ನ ಮುಂದಿನ ಬದುಕಲ್ಲಿ ನೀವು ನನ್ನಜೊತೆ ಇರ್ತೀರ?

14 ಜನ

ಜಗತ್ತಿನ ಸಾಧಾರಣ ಸುಂದರಿ,ಹಾಗು ನನ್ನಜಗತ್ತಿನ ದೀಪಿಕ,ಐಶು,ಜಿಂಟಾ,ರಾಧಿಕ,ರಮ್ಯ,ದಿವ್ಯ,ಸೌಮ್ಯ ಕಾವ್ಯರಿಗಿಂತಲೂ ಎರಡು ಕೈ ಮಿಗಿಲಿಲಾದ, ಜಗತ್ತಿನಎಲ್ಲ ಪೋಲಿ ಹುಡುಗರ ಪಾಲಿನ ಸೋದರಿ,ಹಾಗು ನನ್ನ ಪಾಲಿನ,ಪುಟ್ಟಿ,ಪಾಪು, ಜಾನು ಮುದ್ದು, ಲವ್ಲಿ,ಬಂಗಾರು,ಸೋ ಸ್ವೀಟಿ ಚೂಟಿಯಾದ, ರಾಜಾಜಿ ನಗರದದಗ್ರೇಟ್ ವಿವೇಕಾನಂದಕಾಲೇಜಿನ,ಸಮಸ್ತ ಸುಂದರ ಸುಂದರಿಯರ ಪಾಲಿನ ಸುಹಾಸಿನಿಯಾದ, ಹಾಗು ಕಬ್ಬನ್ ಪೇಟೇ ಅವಿನ್ಯೂರೋಡಿನ ಲೋಟಸ್ ಫ್ಯಾನ್ಸಿ ಸ್ಟೋರಿನಯಜಮಾನಿಯಾದ, ಎಲ್ಲಕ್ಕಿಂತಲೂ ೨೦೧೨ ಮಾರ್ಚ್ ೧೪ ಮತ್ತು ೧೫ರಂದು ನನ್ನ ಮೊದಲ ಹಾಗು ಕೊನೆಯ ಹೆಂಡತಿಯಾಗುವತಯಾರಿಯಲ್ಲಿರುವ ಹಾಗು, ೨೦೧೩ ಮಾರ್ಚ್ ೧೪ ಅಥವ ೧೫ರಂದು ನನ್ನ ಮುದ್ದು ಮಗುವಿನ ತಾಯಿಯಾಗಲುಗಡಿಬಿಡಿಯಲ್ಲಿರುವ,ನನ್ನ ಪ್ರೀತಿಯ ನಳಿನಿ ಮೇಡಮ್‌ಗೆ, ಈ ಪತ್ರದ ಮೂಲಕ ಲವ್ ಯೂಅಂತ ಹೇಳ್ತಾ ಇದ್ದೀನಿ,ಜೊತೆಗೆ ಮೊನ್ನೆತಾನೆ ಆಚರಿಸಿಕೊಂಡ ನಿಮ್ಮ ಬರ್ಥ್‌ಡೇ ಗೆ ವಿಷ್ ಮಾಡಲಾಗದ ನನ್ನ ಮರೆಗುಳಿತನವನ್ನ ಕ್ಷಮಿಸಿ ಮೇಡಂಅನ್ನುತ್ತ ಮತ್ತೊಮ್ಮೆ ಲವ್ ಯೂಅಂತಿದ್ದೀನಿ,

ಚಿನ್ನಾ, ಈ ಬದುಕು ನನ್ನನ್ನಎಲ್ಲಿಂದಎಲ್ಲಿಗೆಕರೆದುಕೊಂಡು ಬಂತುಅಂತಯೋಚಿಸುತ್ತಾ ಹೊರಟರೆಅದೇ ನಾಲ್ಕು ಮಾಂಗಲ್ಯ,ಐದುರಂಗೋಲಿ ಸೀರಿಯಲ್ಲುಗಳ ಎಪಿಸೋಡುಗಳಾಗುವಷ್ಟು ಸರಕಾಗುತ್ತದೆ,ನನ್ನಂತ ಸಾಧಾರಣ ಹುಡುಗನಿಗೆ,ನಿಮ್ಮಂತ ಸಿಂಪಲ್ ಡಿಂಪಲ್ ಸೂಪರ್ ಹುಡುಗಿಯನ್ನಜೊತೆ ಮಾಡ್ತಇರೋ ನಮ್ಮಎರಡೂ ಮನೆಯವರಿಗೆಥ್ಯಾಂಕ್ಸ್ ಹೇಳ್ಬೇಕು ಅನ್ನಿಸ್ತಿದೆ. ನನಗೆಂತ ಹೃದಯ ಬೇಕು ಅಂದುಕೊಂಡಿದ್ದೆನೋಅದೇ ಹೃದಯವನ್ನ ನನ್ನಜೊತೆ ಮಾಡ್ತಿರೋದೇವರಿಗೆಇಲ್ಲಿಂದಲೇ ನನ್ನ ನೂರು ಧನ್ಯವಾದಗಳನ್ನ ಇಲ್ಲಿಂದಲೇರವಾನೆ ಮಾಡ್ತಿದ್ದೀನಿ ಮುದ್ದು.ಗೊತ್ತುಗುರಿಯಿಲ್ಲದೆ ಸಾಗುತ್ತಿದ್ದ ನನ್ನ ಬದುಕಿನೊಳಗೆ ನಿಮ್ಮ ಮೊದಲ ಹೆಜ್ಜೆಯಿಟ್ಟು ಬರ್ತಿದ್ದೀರಿ, ಐವತ್ತುಕೇಜಿ,ಪ್ರೀತಿ,ನೂರುಕೇಜಿ ಮಮತೆ, ಟನ್ನುಗಟ್ಟಲೆ ನಂಬಿಕೆಯನ್ನ ಹೊತ್ತುಕೊಂಡು ನನಗೋಸ್ಕರ ಬನ್ನಿ ನಳಿನಿ ಮೇಡಮ್. ಅದರಜೊತೆಗೆ ಕೆಲವು ಗ್ರಾಮುಗಳಷ್ಟು ನೋವನ್ನುತಂದು ನನ್ನೆದೆಗೆ ಸುರಿದುಬಿಡಿ, ಹೇಗಿದ್ದರು ಅತ್ತು ಹಗುರಾಗಲಿಕ್ಕೆ ನಿಮ್ಮ ಮಮತೆತುಂಬಿದ ಮಡಿಲುಇದ್ದೇಇದೆ.

ಒಂದು ಬದುಕನ್ನಕಟ್ಟಲಿಕ್ಕೆ ಹೊರಟಿದ್ದೀವಿ, ನಮ್ಮ ಸಿಟ್ಟು ಸೆಡವು ಕೋಪ ತಾಪ,ಅಹಮ್ಮು,ಅಹಂಕಾರಗಳನ್ನ ಮೂಟೆಕಟ್ಟಿ ಪಕ್ಕಕ್ಕೆತ್ತಿಬಿಡೋಣ, ಒಂದು ಮುತ್ತಾದರೂ ಸರಿಒಂದುತುತ್ತಾದರೂ ಸರಿ, ಇಬ್ಬರೂ ಹಂಚಿಕೊಳ್ಳೋಣ, ಯಾರುಯಾರನ್ನೂ ಹಚ್ಚಿಕ್ಕೊಳ್ಳಲಾಗದಷ್ಟು ಹಚ್ಚಿಕ್ಕೊಳ್ಳೋಣ,ಮೆಚ್ಚಿಕ್ಕೊಳ್ಳೋಣ, ತಪ್ಪು ನನ್ನದಿದ್ದರೂಚಿಂತೆಯಿಲ್ಲ ನಾನೇ ಕ್ಷಮೆ ಕೇಳ್ತೀನಿ, ತಪ್ಪು ನಿಮ್ಮದಿದ್ದರೂ ಪರ್ವಾಗಿಲ್ಲ, ಲವ್ ಯು ಮುದ್ದುಅಂತ ನಾನೆ ಮುದ್ದು ಮಾಡ್ತೀನಿ, ಆದ್ರೆ ಕೆಲವೊಂದು ಸಲ ನಿಮಗೆ ದುರಾಸೆ, ಎರೆಡೆರೆಡು ಮಕ್ಕಳು ಬೇಕು ಅಂತ ನನ್ನಜೊತೆ ಜಗಳಕ್ಕೇ ನಿಲ್ತೀರಿಅಲ್ವ? ಪ್ರೀತಿಯಿಂದ ಜಗಳ ಆಡೋಕೆರೆಡಿಇದ್ದೀರ ಹೇಳಿ ನಾನು ತಯಾರಾಗೇ ಇದ್ದೀನಿ, ಒಂದೇ ಮಗು ಸಾಕು ಅನ್ನುವ ನನ್ನಜನ್ಮ ಸಿದ್ಧ ಹೋರಾಟದಲ್ಲಿಯಾವುದೇ ಬದಲಾವಣೆಯಿರುವುದಿಲ್ಲ ತಿಳ್ಕೊಳ್ಳಿ ಅಷ್ಟೆ.

ತುಂಬಾ ಭಾವುಕ ಹುಡುಗನಂತೆ ನಾನು, ನನಗೆ ಯಾವುದೂ,ಯಾರೂಗ್ರೇಟ್‌ಅನ್ನಿಸೋದೆಇಲ್ವಂತೆ.ಎಲ್ಲದಕ್ಕು ಸ್ವಲ್ಪಅತಿಯಾಗಿರಿಯಾಕ್ಟ್ ಮಾಡ್ತೀನಂತೆ, ಅದೇಕಾರಣಕ್ಕೆಯಾರೂ ನನ್ನನ್ನ ಅಷ್ಟಾಗಿ ಹಚ್ಚಿಕ್ಕೊಳ್ಳಲಿಲ್ಲ, ನನ್ನ ಪ್ರಪಂಚ ನನ್ನದು, ನನ್ನ ಬದುಕು ನನ್ನದುಅಂತ ನಾನು ಕೂಡಯಾರನ್ನೂ,ಯಾವುದನ್ನು ಅಷ್ಟು ಸುಲುಭವಾಗಿ ಮೆಚ್ಚಿಕ್ಕೊಳ್ಳಲಿಲ್ಲ. ಮುಂಗೋಪಿ ಅಂದ್ರು, ಭಾವನೇಗಳೇ ಇಲ್ಲದಯಾವುದೋ ಪ್ರಪಂಚದಜೀವಿ ಅಂದ್ರು ಐ ಡೋಂಟ್‌ಕೇರ್‌ಚಿನ್ನ, ನಾನು ಏನಂತ ನನಗೆ ಮಾತ್ರಗೊತ್ತು, ನನ್ನ ಮುಂದಿನ ಬದುಕಲ್ಲಿ ನೀವು ನನ್ನಜೊತೆಇರ್ತೀರಅನ್ನೊ ಸಂಗತಿಯೇತುಂಬಾ ಖುಷಿ ಕೊಡ್ತಿದೆ, ಇನ್ನು ಈ ಬದುಕಿನ ಪುಟಗಳೊಳಗೆ ಏನು ಬರುತ್ತೋ ಬರಲಿ, ಎಲ್ಲವನ್ನೂ ನಿಮ್ಮಜೊತೆಗೂಡಿ ಎದುರುಗೊಳ್ತೀನಿ, ಪ್ರಪಂಚದಲ್ಲಿ ಪ್ರೀತಿಅನ್ನೊ ಪ್ರಶ್ನೆಗೆಕೋಟ್ಯಾಂತರ ಉತ್ತರಗಳಿರಬಹುದು, ಆದರೆ ನನ್ನ ಪ್ರಪಂಚದ ಪ್ರೀತಿ,ನಂಬಿಕೆ,ಮಮತೆಅಂದ್ರೆ ,ಎಲ್ಲವೂ ನೀವೆ ಮೇಡಮ್. ಪರಿಚಯವಾದ ಇಷ್ಟೇ ದಿನಗಳನ್ನ ಅದೆಷ್ಟೋಜನುಮದ ಪ್ರೀತಿ ಮಮತೆ ತೋರಿಸಿದ್ದೀನಿ, ನಂಬಿಕೆ ಹುಟ್ಟಿಸಿದ್ದೀರಿ, ಇದೆಲ್ಲವನ್ನು ನಾವು ನಮ್ಮ ಬದುಕಿನ ಮುಸ್ಸಂಜೆಯವರೆಗೂ ಉಳಿಸಿಕೊಳ್ಳೋಣ ಏನಂತೀರಿ. ?

 

nimma

M

ಪ್ರೇಮಕಥೆಯ ಕೊನೆಯ ಪುಟವನ್ನ ಹರಿದೆಸೆದವಳು ನಾನಲ್ಲ

14 ಜನ

ರೀ ಹೇಗಿದ್ದೀರಿ? ಎಲ್ಲಿದ್ದೀರಿ?ಮೊದಲಿದ್ದ ನಿಮ್ಮ ಮಗುವಿನಂತ ಮುಗ್ಧತೆಯನ್ನ ಹಾಗೆ ಉಳಿಸಿಕೊಂಡಿದ್ದೀರೋ ಅಥವ ಬೆಂಗಳೂರೆಂಬ ಮಾಯಾವಿಯತೆಕ್ಕೆಯಲ್ಲಿ ಕಳೆದುಕೊಂಡಿದ್ದೀರೋ?ಈಗಲೂ ನಿಮ್ಮ ಹಣೆಯಲ್ಲಿ ವಿಭೂತಿ ಕುಂಕುಮಗಳೂ ಶೊಭಿಸುತ್ತಿವೆಯೆ?ಪ್ರತಿನಿತ್ಯ ಮನೆಯಲ್ಲಿಗಾಯತ್ರಿ ಮಂತ್ರವನ್ನ ಈಗಲೂ ಜಪಿಸುತ್ತಿದ್ದೀರಾ?ನಿಮ್ಮತಲೆಯ ಕೂದಲಿಗೆ ಈಗಲಾದರೂ ಶಾಂಪುವಿನ ದರ್ಶನ ಮಾಡಿಸುತ್ತಿದ್ದೀರೋ ಅಥವ “ಲೈಫ್ ಬಾಯ್ ಎಲ್ಲಿದೆಯೋ ಅಲ್ಲಿದೇ ಆರೋಗ್ಯ”ಅಂತ ಯಾಮಾರಿಸುತ್ತಿದ್ದೀರೋ?ನಿಮ್ಮನ್ನ ಮರೆಯೋಕಾಗ್ತಿಲ್ಲರೀ, ಬದುಕಿನಲ್ಲಿ ಕೆಲವೊಂದು ಆದರ್ಶಗಳನ್ನಿಟ್ಟುಕೊಂಡವರಿಗೆ ನೀವೊಂದು ಆದರ್ಶ. ಪಿಜಾರೋ, ಸ್ಕೋಡ, ಫೆರಾರಿ ಕಾರುಗಳಲ್ಲಿ ಮೋಜು ಮಸ್ತಿ ಮಾಡಲು ಕಾಲೇಜಿಗೆ  ಬರುತ್ತಿದ್ದ ಹುಡುಗರ ಮದ್ಯೆ ಅಟ್ಲಾಸ್ ಸೈಕಲ್ಲು ತುಳಿದುಕೊಂಡು ಬರುತ್ತಿದ್ದ ನೀವು ತುಂಬಾನೆ ಹಿಡಿಸಿದ್ರಿ. ಹುಡುಗಿಯರನ್ನ ಬೈಕು ಹತ್ತಿಸಿಕೊಳ್ಳೋಕೆ ನಾ ಮುಂದುತಾ ಮುಂದು ಅಂತ ಕಿತ್ತಾಡುತ್ತಿದ್ದ ಅಷ್ಟೂ ಹುಡುಗರ ಮದ್ಯೆ ನಿಮ್ಮ ಡಕೋಟ ಸೈಕಲ್ಲನ್ನ ಅಷ್ಟು ದೂರ ತಳ್ಳಿಕೊಂಡು ಹೋಗಿ ಹತ್ತುತ್ತಿದ್ದ ನಿಮ್ಮ ಪುಕ್ಕಲುತನವೇ ನಿಮ್ಮೆಡೆಹೆ ನನ್ನನ್ನ ಸೆಳೆದಿದ್ದು.

ನೋಟುಗಳು,ಸೈಟುಗಳು,ಬಂಗಲೆಗಳು ನನ್ನಲ್ಲಿಯಾವತ್ತೂ ಪ್ರೀತಿಯನ್ನ ಹುಟ್ಟಿಸಲಿಲ್ಲ ಸಾರ್,  ನನಗೆ ದುಬಾರಿ ಬೈಕು ಕಾರುಗಳಲ್ಲಿ ಬರುತ್ತಿದ್ದಯಾವ ಹುಡುಗನ ಮೇಲೂ ಮನಸ್ಸಾಗಲಿಲ್ಲ, ಆಡಂಬರದ ಬದುಕಿನಿಂದ ದೂರವಿದ್ದು,ಹೃದಯಕ್ಕೆ ಹತ್ತಿರವಾಗಿದ್ದ ನಿಮ್ಮ ಮೇಲೆ ಇವತ್ತಿಗೂ ಮನಸ್ಸಿದೆ ಸಾರ್. ನಿಮ್ಮಿಂದ ನನಗೆ ಪತ್ರ ಬರುವುದಿಲ್ಲ, ನಾನು ಈ ಜನುಮದಲ್ಲಿ ನಿಮ್ಮ ಮುಖ ನೋಡಲಾಗುವುದಿಲ್ಲ ಅನ್ನುವ ಸತ್ಯ ನನಗೆ ತಿಳಿದ್ದಿದ್ದರೂ, ನಿಮ್ಮ ನೆನಪಾದಾಗಲೆಲ್ಲ ನನ್ನೆದೆಯ ಭಾರವನ್ನ ಕಳೆದುಕೊಳ್ಳಲು ಪತ್ರ ಬರೆಯುತ್ತಲೇ ಇದ್ದೀನಿ.ಈ ಪ್ರೀತಿತುಂಬಿದ ಪತ್ರಗಳನ್ನ ನಿಮಗೆ ತಲುಪಿಸುವುದಾದರೂ ಹೇಗೆ ಸಾರ್?ಇನ್ನು ಮೂರು ದಿನ ಕಳೆದರೆ ನಿಮ್ಮ ಹುಟ್ಟುಹಬ್ಬ,  ಹೌದು ನಿಮಗೆಷ್ಟು ವರ್ಷವಾಯಿತು? ನನ್ನ ಲೆಕ್ಕ ತಪ್ಪಿಲ್ಲದಿದ್ದರೆ ಮೂವತ್ತುಅಲ್ವ?ನನ್ನ ಹೃದಯದ ಲೆಕ್ಕ ನಿಜವೇಆಗಿದ್ದರೆ ನೀವಿನ್ನೂ ಮದುವೆಯಾಗಿರುವುದಿಲ್ಲ, ಅಪ್ಪಟ ಪ್ರೇಮಿಯಂತೆ ನನ್ನ ಪ್ರೀತಿಸಿದವರು ನೀವು, ಥೂ ಹೋಗಾಚೆ ಎಂದು ನಿಮ್ಮ ಬದುಕಿನಿಂದಎದ್ದು ಬಂದವಳು ನಾನು ಅಲ್ವ ಸಾರ್?ಅಪ್ಪಅಮ್ಮನ ಪ್ರೀತಿಗೋಸ್ಕರ ನನ್ನ ಪ್ರೀತಿ ಬಲಿಕೊಟ್ಟೆಅನ್ನುವ ಸತ್ಯ ನಿಮಗೆ ಗೊತ್ತಿರಲಿಕ್ಕಿಲ್ಲಅಲ್ವ ಸಾರ್, ಕೊನೆಗೂ ನಿಮಗೊಂದುಕಾರಣವನ್ನೂ ಹೇಳದೆ ನಿಮ್ಮ ಬದುಕಿನಿಂದ ಹೊರಗೆ ಬಂದ ನನ್ನನ್ನದಯವಿಟ್ಟು ಕ್ಷಮಿಸಿಬಿಡಿ.

ಕೋಟ್ಯಾಧಿಪತಿಗಂಡ,ಬಂಗಲೆಯಂತಹ ಮನೆ,ಕೈಗೊಂದುಕಾಲಿಗೊಂದು ಆಳು, ವಿಲಾಸಿ ಜೀವನ,ಕಷ್ಟ ತಿಳಿಯದ ಬದುಕು, ನನಗಿದೆಲ್ಲ ಬೇಕಿರಲಿಲ್ಲ, ನನಗೆ ನೀವು ಬೇಕಿತ್ತು, ನಿಮ್ಮ ಮಗುವಿನಂತಹ ಪ್ರೀತಿ ಬೇಕಿತ್ತು, ಬದುಕಿನಲ್ಲಿ ಕಷ್ಟಗಳು ತಿಳಿಯದೆ ಬದುಕು ಪರಿಪೂರ್ಣವಾಗುವುದಾದರೂ ಹೇಗೆ? ಕೊನೆಗೂ ಯಾವುದೂ ನನ್ನಕೈಗೆಟುಕಲಿಲ್ಲ, ಕೊನೆಯ ಪಕ್ಷ ಈ ಬದುಕು ಮುಗಿಯುವುದರೊಳಗೆ ಮತ್ತೆ ನಿಮ್ಮನ್ನ ನೋಡುತ್ತಿನೋ ಇಲ್ವೋ ಅದೂ ಗೊತ್ತಿಲ್ಲ, ಬರೆದ ಅಷ್ಟೂ ಪತ್ರಗಳನ್ನೂ ನಿಮಗೆ ತಲುಪಿಸಬೇಕು ಸಾರ್, ಒಂದು ಸುಂದರ ಪ್ರೇಮಕಥೆಯಕೊನೆಯ ಪುಟವನ್ನ ಹರಿದೆಸೆದವಳು ನಾನಲ್ಲಅನ್ನುವ ಸತ್ಯವನ್ನ ನಿಮಗೆ ತಿಳಿಸಬೇಕು, ಮೊದಲು ದಿನಕ್ಕೆಷ್ಟು ಬಾರಿ ನಿಮ್ಮ ಹೆಸರನ್ನಕರೆದು ಗೋಳು ಹೋಯ್ದುಕೊಳ್ಳುತ್ತಿದ್ದ ನಾನು ಇವತ್ತು ನಿಮ್ಮ ಹೆಸರು ಹೇಳುವ ಯೋಗ್ಯತೆಯನ್ನೂ ಕಳೆದುಕೊಂಡಿದ್ದೀನಿ ಸಾರ್, ದೇವರಲ್ಲಿ ನನ್ನ ಮೊದಲ ಕೊನೆ ಬೇಡಿಕೆಯೊಂದೆ, ನೀವು ಚನ್ನಾಗಿರಬೇಕು, ಪ್ಲೀಸ್ ಮದುವೆಯಾಗಿ ಸಾರ್, ಎಲ್ಲ ಹುಡುಗಿಯರೂ ನನ್ನಷ್ಟುಕ್ರೂರಿಯಾಗಿರೋದಿಲ್ಲ. ದೇವರಂತ ನಿಮಗೆ ದೇವತೆಯಂತ ಹುಡುಗಿ ಸಿಕ್ಕೇ ಸಿಕಾಳೆ. ದಯವಿಟ್ಟು ಕ್ಷಮಿಸಿಬಿಡಿ ತಪ್ಪು ನನ್ನದಲ್ಲ ಆ ದೇವರದ್ದು.  ನನ್ನಐದು ತಿಂಗಳ ಮಗುವಿಗೆ ನಿಮ್ಮದೇ ಹೆಸರಿಟ್ಟಿದ್ದೀನಿ ಸಾರ್, ಮೇಲ್‌ಐಡಿಗೆ  ಪಾಸ್‌ವರ್ಡ್‌ಕೂಡ ನಿಮ್ಮ ಹೆಸರೆ..! ಈ ಜನುಮದಲ್ಲಿ ನಾನು ಪಡೆದುಕೊಂಡು ಬಂದಿದ್ದಿಷ್ಟೆ.

ಯಾವತ್ತೂ ನಿಮ್ಮವಳು

 ಮೋಸದ ಹುಡುಗಿ

 

ನಂದಿನ್ನೂ ಎಸ್.ಎಸ್.ಎಲ್.ಸಿ ಮುಗಿದಿರಲಿಲ್ಲ,ಕೆಲವರು ಅಲೆಲೆಲೆ ಜಿಂಕೆಮರಿ ಅಂತಿದ್ರು,

19 ಜೂನ್

ಹೆಸರು ಮಾನಸ ಗೌಡ, ಚಿಕ್ಕಮಂಗಳೂರ ಚಿಕ್ಕಮಲ್ಲಿಗೆ.. 1992 ಜೂನ್ 6, ಕರ್ಕಾಟಕ ರಾಶಿ, ಮಿಥುನ ಲಗ್ನ, ಅಶ್ಲೇಷ ನಕ್ಷತ್ರ. ಇದು ನಂದು ಜೋಟ ಬಯೋಡೇಟ,  ಇವತ್ತಿಗೆ ಸರಿಯಾಗಿ 19 ತುಂಬಿ 20ರ ಮಾಯಾಲೋಕದೊಳಗೆ ಕಾಲಿಡ್ತ ಇದ್ದೀನಿ. ನಂದಿನ್ನೂ ಎಸ್.ಎಸ್.ಎಲ್.ಸಿ ಮುಗಿದಿರಲಿಲ್ಲ,ಕೆಲವರು ಅಲೆಲೆಲೆ ಜಿಂಕೆಮರಿ ಅಂತಿದ್ರು, ಮತ್ತೆ ನನ್ನ ಕನ್‌ಫ಼್ಯೂಸ್ ಮಾಡ್ಕೊಂಡು ಅಯ್ಯಾಂಗಾರ್ ಪಿಳ್ಳೆ ಅಳಗಾ ಇರುಕ್ಕು ಅಂತಿದ್ರು. ಚೂಡ್ರಾ ಎಲಾವುಂದಿ ಫಿಗರ್ರು.. ಮಂಚ ಗಮ್ಮತಗಾ ವುಂದಿ ಅಂದ ಹೈದರೆಷ್ಟೋ, ದಿಲ್ ದೇದಿಯಾ ಹೈ ಜಾನ್ ತುಮ್ಹೆ ದೇಂಗೆ ಅಂತ ಹೃದಯ ಪರಚಿಕೊಂಡ ಗಂಡುಮಕ್ಕಳೆಷ್ಟೋ, ಎಲ್ಲ ಹುಡುಗ್ರೂ ಇವಳೊಬ್ಳ ಹಿಂದೇನೆ ಹೋಗ್ತಾರೆ ಅಂತ ಸಿಟ್ಟುಮಾಡಿಕೊಂಡ ಹುಡುಗಿಯರೆಷ್ಟೋ. ಹೆಸರು ಕುಲ ಗೋತ್ರ ಗೊತ್ತಿಲ್ಲದ ಹೂಗಳನ್ನ ಕಿತ್ತು ತಂದು ನನ್ನ ಮುಂದಿಟ್ಟು ನಾಚಿಕೊಳ್ಳುತಿದ್ದ ಸಭ್ಯ ಗಿರಿ, ನನ್ನ ಹೆಸರಿನ ಹಚ್ಚೆಯನ್ನ ಮೈತುಂಬ ಬರೆಸಿಕೊಂಡು ನನ್ನ ಮುಂದೆ ಶರ್ಟು ಬಿಚ್ಚಿ ನಿಲ್ಲುತ್ತಿದ್ದ ಪೋಲಿ ಸೋಮ, ಚಿಲ್ಲರೆ ಕೊಡುವ ನೆಪದಲ್ಲಿ ನನ್ನ ಮೈಕೈ ಮುಟ್ಟುತ್ತಿದ್ದ ಮೂಕಂಬಿಕ ಜನರಲ್ ಸ್ಟೋರಿನ ಪುಟ್ಟರಾಜು ಅಂಕಲ್, ಒಂಬತ್ತನೆ ತರಗತಿಯಿಂದ ಎಸ್.ಎಸ್.ಎಲ್.ಸಿಯವರೆಗೆ ಪ್ರತಿ ದಿನ ಒಂದೊಂದು ಲವ್ ಲೆಟರ್ ಕೊಡುತಿದ್ದ ತಮಿಳು ಹುಡ್ಗ ಬ್ಲಾಕ್ ತಂಬಿ, ಒಂದು ವರ್ಷದಿಂದ ಇವತ್ತಿಗೂ ನನ್ನ ನಂಬರ್ ತಿಳಿದುಕೊಳ್ಳಲು ಪರದಾಡುತ್ತಿರುವ ಡೀಸೆಂಟ್ ಫೆಲೋ ಪ್ರದೀಪ್, ಅಮ್ಮನ ತಮ್ಮ ಕಿರಣ್, ಅಪ್ಪನ ಸ್ನೇಹಿತರ ಮಗ ಸಿ.ಡಿ ರಾಜಪ್ಪ, ನನಗೆ ಅರ್ಥವಾಗದ ಉರ್ದು ಗಝಲ್ಲುಗಳನ್ನ ಕಣ್ಣೀರು ತುಂಬಿಕೊಂಡು ನನ್ನ ಮುಂದೆ ತಲೆತಗ್ಗಿಸಿಕೊಂಡು ಹೇಳುತ್ತಿದ್ದ ಅಮರ ಪ್ರೇಮಿ ಸಯ್ಯದ್ ಅಶ್ರಫ್ ಎಂಬ ಅಮರ ಪ್ರೇಮಿ, ಕಾಡಿನಿಂದ ಇಡೀ ಜೇನು ತಂದು ನನ್ನ ಮುಂದಿಡುತಿದ್ದ ವಡ್ಡರ ಹುಡುಗ ಪೋಲಿ ಪಾಂಡು, ಅಷ್ಟೆತ್ತರದ ಹುಳಿಮಾವಿನ ಮರವನ್ನ ಹತ್ತಿ ನನಗೆ ಹಣ್ಣು ತಂದುಕೊಡುತ್ತಿದ್ದ  ಶಶಾಂಕ್..

 ಅಬ್ಬಾ..! ಒಬ್ಬೊಬರದೂ ಒಂದೊಂದು ತರಹದ ಪ್ರೀತಿ, ಕೆಲವೊಮ್ಮೆ ಖುಷಿಯಗ್ತಿತು,ಕೆಲವೊಮ್ಮೆ ಕೋಪ ಮತ್ತೊಮ್ಮೆ ಸಣ್ಣ ದಿಗಿಲು, ಇಷ್ಟು ಜನರ ಪ್ರೀತಿಯ(?)ಹೊಳೆಯಲ್ಲಿ ಮುಳುಗದೇ ಇವತ್ತು ಕಾಲೇಜಿನ ಮೆಟ್ಟಿಲ ಮೇಲೆ ಬಂದು ನಿಂತಿದ್ದೀನಿ, ನನ್ನ ಅಷ್ಟೊಂದು ಪ್ರೀತಿಸುತ್ತಿದ್ದ ಹುಡುಗರಲ್ಲಿ ಯಾರೊಬ್ಬರಿಗಾದರೂ ಎಸ್ ಎಂದುಬಿಡಲೇ ಅಂತ ಸಾವಿರ ಸಲ ಯೋಚಿಸುತ್ತಿರುವಾಗಲೇ ಅಸೆಬುರುಕ ಮನಸ್ಸು “ ಏಯ್ ಸುಮ್ನಿರು ಇನ್ನೂ ಚಂದದ ಹುಡುಗ ಸಿಕ್ತಾನೆ ಅಂತ ಗದರಿಸುತ್ತಿತು. ಹೃದಯ ಮಾತ್ರ “ಇನ್ನೂ ಒಳ್ಳೆಯ ಹುಡುಗ ಸಿಕ್ತಾನೆ ಕಾಯಬೇಕು ಹುಡುಗಿ ಅಂದ ಹಾಗಾಗುತ್ತಿತು, ನನಗೆ ಚಂದದ ಹುಡುಗನಿಗಿಂತ ಒಂದೊಳ್ಳೆ ಹುಡುಗ ಬೇಕು, ಒಂದೊಳ್ಳೆ ಅಪ್ಲಿಕೇಷನ್ ಬರಬಹುದು ಅನ್ನುವ ನಿರೀಕ್ಷೆಯಲ್ಲಿ ನಾನಿದ್ದೀನಿ.

 ನನ್ ಬಗ್ಗೆ ಎರಡೇ(?) ಸಾಲಲ್ಲಿ ಹೇಳ್ಬಿಡ್ತೀನಿ, ಕೋಪ ಬೇಗ ಬರುತೆ, ಅಳು ಮಾತ್ರ ಶತಾಬ್ಧಿ ಎಕ್ಸ್‌ಪ್ರೆಸ್‌ಗಿಂತಲೂ ಸ್ಪೀಡು, ಅಮ್ಮ ಅಂದ್ರೆ ಇಷ್ಟ, ಅಪ್ಪ ಅಂದ್ರೆ ಪ್ರಾಣ, ಚುರುಕು ಮಾತಿನ ಹುಡುಗಿ, ಸುದೀಪ್ ಅಂದ್ರೆ ಇಷ್ಟ, ದರ್ಶನ್ ಅಂದ್ರೆ ಅಷ್ಟಕಷ್ಟೆ, ಪಿಜ್ಜಾ ಬರ್ಗರ್ ಮುಖ ಮೂತಿ ನೋಡಿಲ್ಲ, ರಸ್ತೆ ಬದಿಯ ಪಾನಿ ಪೂರಿ ಜೊತೆಗೆ, ಮಲ್ಲೇಶ್ವರಂ ಜನತಾ ಹೋಟ್ಲಿನ ಮಸಾಲ ದೋಸೆ, ಸಿ.ಟಿ.ಅರ್ ಬೆಣ್ಣೆದೋಸೆ,ವೀಣ ಸ್ಟೋರ್ ಇಡ್ಲಿವಡೆ, ಹಳ್ಳಿ-ತಿಂಡಿಯ ಚಟ್ನಿಪುಡಿ, ೧೫ನೇ ಕ್ರಾಸಿನ ಮ್ಯಾಕ್ ಡೊನಾಲ್ಡು, ಜಯನಗರದ ಕೂಲ್ ಜಾಯಿಂಟು, ಸಜ್ಜನ್ ರಾವ್ ಸರ್ಕಲ್ಲಿನ ವಿ.ಬಿ ಬೇಕರಿ, ಸುಪ್ರಭಾತ ಕಾಫಿ ಹೌಸಿನ ಅನ್ನ ಸಾಂಬಾರ್, ಸಂಪಿಗೆ ರೋಡಿನ ಕರ್ನರ್ ಅಂಗಡಿಯ ಬೆಣ್ಣೆ ಗುಲ್ಕನ್ನು, ಅಂದ್ರೆ ಪಂಚಪ್ರಾಣ. ಪ್ರತಿ ದಿನ ಬೇಕು ಅಂತ ಏನಿಲ್ಲ, ವಾರಕ್ಕೆರಡು ಸಲ ಕರ್ಕೊಂಡ್ ಹೋದ್ರು ಓಕೆ. ಇನ್ನು ಹುಡುಗ ಹೇಗಿರ್ಬೇಕು ಅಂದ್ರೆ ತುಂಬಾ ಸುಂದರವಗಿರೋದೇನ್ ಬೇಡ, ಹಾಗಿದ್ರೆ ಗೆಳತಿಯರಿಗೆ ಮೀಟ್ ಮಾಡ್ಸ್‌ಬೇಕಾಗುತೆ, ಕಪ್ಪು ಬಣ್ಣದ ಹುಡುಗ ಹಾಲಿನಂತ ಮನಸ್ಸು, ನನ್ನನ್ನ ನನ್ನ ಮನೆಯವರನ್ನ ಪ್ರೀತಿಸಿ ಗೌರವಿಸುವ ಹೃದಯವಿರಬೇಕು, , ಸ್ವಲ್ಪ ಪೋಲಿ ಆಗಿದ್ರೆ ಓಕೆ, ಹದ್ದು ಮೀರಿದ್ರೆ ಯಾಕೆ ಅಂತ ಕೇಳ್ತೀನಿ, ಜೀನ್ಸ್ ಹಾಕ್ಲೇಬೇಕು ಅಂತ ಪೀಡಿಸೋ ಹಾಗಿಲ್ಲ, ಚೂಡಿಯಲ್ಲೆ ತುಂಬ ಮುದ್ದಾಗಿ ಕಾಣಿಸ್ಕೊಳ್ಳೋಕು ಬರುತ್ತೆ, ಪ್ರತಿ ಸಲ ಐ ಲವ್ ಯೂ ಹೇಳು ಅಂತ ಪೀಡಿಸೋ ಹಾಗಿಲ್ಲ, ನನಗಿಷ್ಟ ಆದ್ರೆ ಐ ಲವ್ ಯೂ ಅಂತೀನಿ, ಅದ್ರೆ ಲವ್ ಯೂ ಟೂ ಅಂತ ಹೇಳಲೇ ಬೇಕು, ಪಾರ್ಕಲ್ಲಿ ಕೂತಿರೋವಾಗ ಒಂದು ಫೀಟ್ ದೂರ, ನನಗೆ ತುಂಬಾ ಬೇಜಾರಾದಾಗ ನಾನು ಕರೆದಷ್ಟು ಹತ್ತಿರ, ಅಯ್ಯೋ ಪಾಪ ಅನ್ನಿಸಿದ್ರೆ ಯಾರಿಗೂ ಗೊತ್ತಾಗದ ಹಾಗೆ ಅವನಿಗೊಂದು ಸಣ್ಣ ಮುತ್ತು(ಶರತ್ತುಗಳು ಅನ್ವಯಿಸುತ್ತವೆ) ವಾಪಾಸು ಕೊಡುವ ಹಾಗಿಲ್ಲ ಅನ್ನುವ ಕರಾರಿಗೆ ಒಪ್ಪುವುದಾದರೆ ಮಾತ್ರ.

 ಏನಪ್ಪ ಈ ಹುಡುಗೀದು ದೊಡ್ಡ ಲೀಸ್ಟೇ ಇದೆ ಅಂತ ಕೋಪ ಮಾಡ್ಕೋತೀರೇನೋ. ನಿಮ್ಮನ್ನ ಸುಮ್ನೆ ಗೋಳು ಹೊಯ್ಕೊಬೇಕು ಅನ್ನಿಸ್ತು ಅದ್ಕೆ ಹೀಗೆಲ್ಲ ಮಾತಾಡ್ಬಿಟ್ಟೆ.  ಕೊನೆಯವರೆಗೂ ನಾನು ನಿನ್ ಜೊತೆ ಇರ್ತೀನಿ ಅನ್ನುವ ಸಣ್ಣ ಭರವಸೆ ನನಗೆ, ಮತ್ತು ಪ್ರಾಮಾಣಿಕವಾಗಿ ಒಂದೊಳ್ಳೆ ಬದುಕನ್ನ ನಿನ್ನ ಮಗಳಿಗೆ ಕೊಡ್ತೀನಿ ಅನ್ನುವ ಧೈರ್ಯವನ್ನ ನನ್ನ ಅಪ್ಪ ಅಮ್ಮನಿಗೆ ಕೊಡುವ ಯಾರಾದರೂ ಹುಡುಗ ಇದ್ರೆ ಯಾವುದೇ ಶರತ್ತಿಲ್ಲದೆ ಅವನ ಪ್ರೀತಿಗೆ ಎಸ್ ಅನ್ನೋಕೆ ಈ ನವಿಲೂರ ಹುಡುಗಿ ಕಾಯುತ್ತಿದ್ದಾಳೆ. ಪ್ಲೀಸ್ ಫೋನ್ ಮಾಡಿ. ಸ್ಟಿಲ್ ವೈಟಿಂಗ್

ನವಿಲೂರು ಹುಡುಗಿ

 8722೫೯೩೩೧?